रोमाञ्जक मोडमा कांग्रेस बाँके अधिवेशन, देउबा पक्षका मतदाता झन अन्यौलमा

राजनीति

गृहपृष्ठ
राजनीति
रोमाञ्जक मोडमा कांग्रेस बाँके अधिवेशन, देउबा पक्षका मतदाता झन अन्यौलमा

रोमाञ्जक मोडमा कांग्रेस बाँके अधिवेशन, देउबा पक्षका मतदाता झन अन्यौलमा

सोमबार, फागुन १६, २०७८ बागेश्वरी पोस्ट

नेपालगञ्ज । नेपाली कांग्रेस बाँकेको जिल्ला अधिवेशन फागुन १९ गते हुँदैछ । त्यसका लागि उम्मेदवारी दर्ता भइसकेको छ । सभापति पदमा संस्थापन (शेरबहादुर देउबा) बाट दुई जना र इतर पक्ष (डा.शेखर कोइराला) बाट एक जना गरी तीन जना उम्मेदवार छन् । संस्थापनबाट बादशाह कुर्मी र सुरेन्द्र बहादुर हमाल दुबैले उम्मेदवारी दर्ता गराउँदा संस्थापन इतरबाट भने नारायणप्रसाद गौडेलले मात्र उम्मेदवारी दर्ता गराए । सभापतिमा संस्थापनबाट दुई जना उम्मेदवार मैदानमा उत्रिँदा धर्मसंकटमा परेका मतदाताहरु अहिले थप अन्यौलमा छन् ।

आज दिउँसो केन्द्रबाट संस्थापनको आधिकारिक उम्मेदवार हमाल नै भएको सन्देश बाँकेमा प्रवाह भइरहँदा संस्थापनको आफू नै आधिकारिक उम्मेदवार भएको भन्दै कुर्मी प्रचारप्रसारमा जुटिरहेका थिए । आज विकसित पछिल्लो घटनाक्रमले बाँके कांग्रेसको अधिवेशनलाई थप रोमाञ्चक मोडमा पुर्याइदिएको छ । भित्रभित्रै आफूलाई आधिकारिक भएको प्रचार गरिरहेका हमाल र कुर्मीबीच सहमति जुट्न नसक्दा संस्थापनले सभापति बाहेक अन्य पदमा मात्र प्यानल घोषणा गर्न सकेको थियो ।

केन्द्रिय सदस्य मैकुलाल बाल्मिकीले केन्द्रको कुरा अनुसार हमाल नै आधिकारिक भएको बताएपनि कुर्मी स्वयम् यसलाई मान्न तयार छैनन् । कुर्मी कुनै हालतमा पनि व्याक नहुने उनका निकटबर्तीहरु बताउँछन् । उनी धेरै अघि बढिसकेकाले अब व्याक हुने अवस्था नरहेको उनीहरुको तर्क छ । यस घटनापछि कुर्मीको धारणा भने बाहिर आइसकेको छैन ।

प्रबक्ता डा.प्रकाशशरण महतले बाल्मिकीलाई फोन गरेर हमाल आधिकारिक उम्मेदवार भएको बताएपनि सहमहामन्त्री किशोरसिंह राठौरले भने दुबै जना संस्थापनकै उम्मेदवार भएको प्रतिक्रिया दिएका छन् । "दुई मध्ये पहिलो चरणमा जसले बढी मत ल्याउँछ उसलाई कम मत ल्याउनेले दोस्रो चरणमा सहयोग गर्छ, अहिले कसैलाई पनि त्यसरी आधिकारिक भनिएको छैन," उनले भनेका छन् । संस्थापनकै नेताहरुबाट फरक फरक कुरा आएपछि नेता कार्यकर्ता झन अन्यौलमा परेका छन् । यसको फाइदा गौडेलले लिने देखिन्छ ।

प्रकाशित मिति: सोमबार, फागुन १६, २०७८ २०:४१

प्रतिक्रिया दिनुहोस्