बादशाह भन्छन्-म संस्थापनकै उम्मेदवार हुँ, कोही भ्रममा नपर्नुस्

राजनीति

गृहपृष्ठ
राजनीति
बादशाह भन्छन्-म संस्थापनकै उम्मेदवार हुँ, कोही भ्रममा नपर्नुस्

बादशाह भन्छन्-म संस्थापनकै उम्मेदवार हुँ, कोही भ्रममा नपर्नुस्

मंगलबार, फागुन १७, २०७८ बागेश्वरी पोस्ट

नेपालगञ्ज । नेपाली कांग्रेस बाँकेको सभापति पदमा उम्मेदवारी दिएका बादशाह कुर्मीले आफ्नो उम्मेदवारी संस्थापन पक्षबाटै भएको स्पष्ट पारेका छन् । कुर्मीले आफू संस्थापनकै उम्मेदवार भएकाले भ्रममा नपर्न भनेका छन् ।

आज विहान आफ्नो फेसबुकमार्फत् एक भिडियो सन्देश सार्वजनिक गर्दै कुर्मीले क्षेत्रीय प्रतिनिधिहरुलाई दिग्भ्रमित बनाउने गरी केही नेताहरुले भ्रमपूर्ण सूचना प्रवाह गरिरहेको आरोप लगाएका छन् । उनले भनेका छन्-"भ्रमपूर्ण सूचनामा कुनै सत्यता नभएको म स्पष्ट पार्न चाहन्छु ।" कुर्मीले आफूसंग पदाधिकारी र सदस्यका उम्मेदवारहरु प्रचारप्रसारमा जुटिरहेको बताएका छन् । "मेरो पक्षमा देखिएको जनसमर्थन, मेरो राजनीतिक योगदान र तपाईंहरु प्रतिको मेरो समर्पणभावले अझ सशक्त बनाएको छ, म सबैलाई मिलाएर पार्टीलाई अझ मजबुत बनाउनेछु," उनले भनेका छन् । उनले आफू र आफ्नो समूहलाई अत्याधिक मत दिएर विजयी बनाउन आग्रह गरेका छन् ।

संस्थापन समूहले बाँकेमा सभापति बाहेक सबै पदमा प्यानल घोषणा गरेपनि सभापतिमा सहमति जुट्न नसक्दा कुर्मी र सुरेन्द्र बहादुर हमालले उम्मेदवारी दिएका छन् । दुबैले आ-आफ्नो उम्मेदवारीलाई आधिकारिक दाबी गरिरहँदा हिजो केन्द्रको निर्णय भन्दै केन्द्रिय सदस्य मैकुलाल बाल्मिकीले हमाल आधिकारिक उम्मेदवार भएको सन्देश प्रवाह गरेका थिए । त्यस लगत्तै सहमहामन्त्री किशोरसिंह राठौरले हमाल र कुर्मी दुबै संस्थापनका उम्मेदवार भएको र पहिलो चरणमा जसले बढी मत ल्याउँछ, दोस्रो चरणमा उसैलाई कम मत ल्याउनेले सघाउने प्रतिक्रिया दिएका थिए ।

हमाल र कुर्मी दुबै ब्याक नहुने अडानमा रहेपछि त्रिपक्षीय प्रतिष्पर्धा नै हुने भएको छ । संस्थापन इतरबाट नारायणप्रसाद गौडेल सभापतिका उम्मेदवार छन् ।
हेर्नुस् भिडियो सन्देश

प्रकाशित मिति: मंगलबार, फागुन १७, २०७८ ११:५७

प्रतिक्रिया दिनुहोस्