चुनावी गठबन्धनको सम्भावनालाई नकार्न सकिँदैनः कांग्रेस प्रबक्ता महत

राजनीति

गृहपृष्ठ
राजनीति
चुनावी गठबन्धनको सम्भावनालाई नकार्न सकिँदैनः कांग्रेस प्रबक्ता महत

चुनावी गठबन्धनको सम्भावनालाई नकार्न सकिँदैनः कांग्रेस प्रबक्ता महत

'चैतभित्रै उम्मेदवार टुंग्याउँछौ, जित्ने मान्छेले टिकट पाउँछ'

शनिबार, चैत ५, २०७८ बागेश्वरी पोस्ट

नेपालगञ्ज । नेपाली कांग्रेसका प्रबक्ता डा.प्रकाशशरण महतले सत्तारुढ दलहरुबीच चुनावी गठबन्धनको सम्भावनालाई नकार्न नसकिने बताएका छन् ।

नेपाल प्रेस युनियन बाँके शाखाले आज नेपालगञ्जमा आयोजना गरेको पत्रकार सम्मेलनमा प्रबक्ता डा.महतले कांग्रेसलाई जे गर्दा फाइदा हुन्छ त्यही अनुसार निर्णय लिने बताए । "हामीलाई गठबन्धन गर्दा फाइदा हुन्छ कि नगर्दा त्यो विश्लेषण गर्छौं, भावनामा बगेर मात्र भएन, हामी पार्टीलाई फाइदा हुने गरी निर्णय लिन्छौं," महतले भने । आगामी केन्द्रीय कमिटीको बैठकले यसबारे निर्णय लिने उनले बताए ।

प्रबक्ता डा.महतले कांग्रेसले चैतभित्र उम्मेदवारहरुको टुंगो लगाउने दाबी गरे । "हामी यसपटक समयमै उम्मेदवारहरुको टुंगो लगाएर निर्वाचनमा होमिन्छौं, अघिल्ला निर्वाचन जस्तो अन्तिम समयमा आएर निर्णय लिने काम यो चोटी हुँदैन, चैतभित्रै उम्मेदवार टुंग्याउँछौं ।"

उनले 'घर-घर जाऔं, कांग्रेस जिताऔं' अभियानलाई सफल बनाउन नेता कार्यकर्तालाई घरघरमा पुग्न आह्वान गरे । "अहिले चुनावी गठबन्धन हुन्छ कि हुँदैन भन्ने कुरामा नलाग्नुस्, पार्टीलाई कसरी आगामी निर्वाचनमा जिताउन सकिन्छ भनेर लाग्नुस्, विपक्षी दलहरुको गरेको दुष्प्रचार र गल्तीहरुको बारेमा बोल्नुस्, एमसीसीका बारेमा फैलाइएको भ्रम चिर्नुस," उनले भने ।

उनले यसपटक जित्ने मान्छेलाई उम्मेदवार बनाइने बताए । "मेरो-तेरो या यो गुट-त्यो गुट भन्ने हुँदैन, जसले जित्ने देखिन्छ, उसैलाई पार्टीले उम्मेदवार बनाउँछ," उनले भने ।

No description available.

प्रबक्ता डा.महतले एमसीसीका बारेमा खडा गरिएको भ्रमको पर्दा खुलेको बताउँदै कांग्रेस सधैं सत्यका पक्षमा उभिने पार्टी भएको बताए । उनले एमसीसी नेपालको हितमा भएकाले कांग्रेसले सत्तामा रहँदा वा प्रतिपक्षमा रहँदा पनि सधैं एउटै बोली बोलेको बताए । उनले एमसीसी पारित भएपछि नेपालको इज्जत र शाख बढेको उल्लेख गरे । "अन्तर्राष्ट्रियस्तरमा खस्किएको शाख र इज्जत जोगिएको छ, नेपालका कम्युनिष्टहरु आफैं बसेर निर्णय गर्छन्, आफैं सहयोग माग्छन् अनि आफैं विरोध गर्छन् भन्ने अवस्था बनेको छ तर कांग्रेस यसमा दृढ भएर उभिँदा देशको इज्जत र शाख बढेको छ," उनले भने ।

प्रकाशित मिति: शनिबार, चैत ५, २०७८ १५:३०

प्रतिक्रिया दिनुहोस्