अकोराबको साधारणसभा एवम् रेडियो सम्मेलन भोलीदेखि नेपालगञ्जमा

समाचार

गृहपृष्ठ
समाचार
अकोराबको साधारणसभा एवम् रेडियो सम्मेलन भोलीदेखि नेपालगञ्जमा

अकोराबको साधारणसभा एवम् रेडियो सम्मेलन भोलीदेखि नेपालगञ्जमा

पाँच जना विशिष्ट व्यक्तित्वहरुलाई सम्मान गरिँदै

मंगलबार, चैत ८, २०७८ बागेश्वरी पोस्ट

नेपालगञ्ज । भोलीदेखि नेपालगञ्जमा शुरु हुने सामुदायिक रेडियो प्रशारक संघ (अकोराब) कोे १६औं बार्षिक साधारणसभा एवम् सामुदायिक रेडियो राष्ट्रिय सम्मेलनको तयारी पूरा भएको छ ।

अकोराबले आज अपरान्ह नेपालगञ्जमा पत्रकार सम्मेलन गरेर दुई दिनसम्म चल्ने साधारणसभा एवम् सम्मेलनको तयारी पूरा भएको जनाएको छ । अकोराबका अध्यक्ष अर्जुन गिरीले साधारणसभा एवम् रेडियो सम्मेलनको उद्घाटन भोली विहान ८ बजे नेपाल सरकारका कानुन, न्याय तथा संसदीय मामिला मन्त्री दिलेन्द्र प्रसाद बडुले गर्ने जानकारी दिए । सम्मेलनमा भाग लिन देशभरका सामुदायिक रेडियो प्रतिनिधिहरु नेपालगञ्ज पुगिसकेका छन् ।

No description available.

अकोराबका अध्यक्ष गिरीले रेडियो सम्मेलन तथा साधारणसभामा रेडियोको भावी कार्यदिशा, प्रतिबद्धता र विभिन्न निकायहरुसंगको अपेक्षासहित नेपालगञ्ज घोषणापत्र जारी गरिने बताए । सम्मेलनमा ‘सामुदायिक रेडियोले हासिल गरेका उपलब्धि एवं यस क्षेत्रका चुनौतीहरुका साथै सामुदायिक रेडियोहरुको अबको बाटो’ विषयमा छलफल गरिने जानकारी दिए ।

अध्यक्ष गिरीले सम्मेलनमा भाषाभाषीको संरक्षण र प्रवद्र्धनमा सामुदायिक रेडियोको भूमिका, विपद् तथा महामारी लगायतका नयाँ चुनौतीहरुको सामना गर्न सक्ने समुदाय निर्माणमा सामुदायिक रेडियोको भूमिका, सामुदायिक रेडियोले आफ्नो प्रशारणमा प्राथमिकता दिनुपर्ने क्षेत्रहरु, दिगो विकासका साथै नेपाली समाजमा विद्यमान विभिन्न कुरिती तथा परम्परागत हानीकारक अभ्यासको अन्त्यका लागि सामुदायिक रेडियोको बुझाई र योगदानका विषयमा संवाद गरिने बताए । "संविधानले व्यवस्था गरे अनुरुप तीन तहको सरकार निर्माण भइसकेको र नयाँ कानुनहरु समेत निर्माण भइरहेको अवस्थामा सामुदायिक रेडियोले निर्वाह गर्ने दायित्वमा समेत विचार र संवाद गरिनेछ," गिरीले भने ।

अकोराबमा आबद्ध देशभरीका ३६१ सामुदायिक रेडियोबाट एक/एक जना प्रतिनिधि सहभागी रहनेछन् । सामुदायिक रेडियोको हक, हित र अधिकारका लागि वि.सं २०५७ चैत्र ९ गते स्थापना भएको सामुदायिक रेडियो प्रसारक संघले दुई दशक पार गरिसकेको छ । भोली अकोराबको स्थापना दिवस पनि हो । सामुदायिक रेडियो देशका ७७ वटै जिल्लाहरुमा सञ्चालनमा छन् ।

यसैबीच साधारणसभा एवम् सम्मेलनमा पाँच जना विशिष्ट व्यक्तित्वहरुलाई सम्मान गर्न लागिएको छ । अध्यक्ष गिरीका अनुसार सामुदायिक रेडियो अभियन्ताहरु पूर्व अध्यक्ष मिन बहादुर शाही र मोहन चापागाईं, संस्थापक मध्येका एक दधिराम सुवेदी, थारु समुदायको बरघर एवम् थारु अगुवा बर्दियाका पतिराम थारु र कला क्षेत्रका साधक नेपालगञ्जका कलाकार श्यामानन्द सिंह ठकुरीलाई सम्मान गर्न लागिएको अध्यक्ष गिरीले जानकारी दिए ।

प्रकाशित मिति: मंगलबार, चैत ८, २०७८ २०:५५

प्रतिक्रिया दिनुहोस्