चिनियाँ विदेशमन्त्री आज नेपाल आउँदै

राजनीति

गृहपृष्ठ
राजनीति
चिनियाँ विदेशमन्त्री आज नेपाल आउँदै

चिनियाँ विदेशमन्त्री आज नेपाल आउँदै

शुक्रबार, चैत ११, २०७८ बागेश्वरी पोस्ट

नेपालगन्ज । चिनका विदेशमन्त्री एबं स्टेट काउन्सिलर वाङ यी तीन दिने नेपाल भ्रमणका क्रममा आज साँझ काठमाडौं आउँदैछन् । परराष्ट्रमन्त्री डा. नारायण खड्काको निमन्त्रणामा उनी आज बेलुकी काठमाडौं आइपुग्ने छन् ।

नेपालमा शेरबहादुर देउवा नेतृत्वको वर्तमान सरकार गठन भएपछि आउने उनी पहिलो उच्चस्तरीय पाहुना हुन् । वाङको महत्त्वपूर्ण कार्यक्रमहरु सबै चैत १२ र १३ गतेलाई राखिएको छ । परराष्ट्र मन्त्रालयका अनुसार चैत १२ गते नेपाल-चीन परराष्ट्र मन्त्री स्तरिय द्विपक्षीय वार्ता हुनेछ । नेपाल बसाइँको क्रममा उनले राष्ट्रपति विद्यादेवी भण्डारी, प्रधानमन्त्री शेरबहादुर देउवा, परराष्ट्रमन्त्री खड्का र प्रमुख राजनीतिक दलका शीर्ष नेताहरुसँग भेटवार्ता गर्नेछन् ।

भ्रमणको सबै तयारी पूरा भएको परराष्ट्र मन्त्रालयले जनाएको छ । विदेशमन्त्री वाङको भ्रमणका लागि उच्चस्तरीय सुरक्षा व्यवस्था गरिएको छ । नेपाल भ्रमणका क्रममा आवश्यक सुरक्षा व्यवस्थापनका विषयमा गृह मन्त्रालयमा छलफल भएको गृह मन्त्रालयका प्रवक्ता सहसचिव फणीन्द्रमणि पोखरेलले बताए । नेपाल र चीनका विदेशमन्त्रीबीच शनिबार हुने वार्तामा नेपाली पक्षले एक दशकभन्दा लामो समयदेखि रोकिएको सिमानाको संयुक्त निरीक्षण, रसुवागढी र तातोपानी नाका पूर्णरूपमा सन्चालन, २०७६ सालमा चिनियाँ राष्ट्रपति सी चीनफिङको नेपाल भ्रमणको बेला भएका सम्झौता कार्यान्वयनलगायत विषयलाई नेपालले उठाउने तयारी गरेको छ । परराष्ट्र मन्त्रालयका अनुसार केही नयाँ सम्झौता र सहमतिको तयारी पनि रहेको छ ।

तथापि जलविद्युत् परियोजना, ट्रान्स हिमालयन सम्पर्क सञ्जाल, बीआरआई परियोजनासँग सम्बन्धित विषयलाई नयाँ पहलसाथ अघि बढाउने विषयमा छलफल र सहमतिको आधार बनाइने मन्त्रालयले जनाएको छ । वाङ चैत १३ गते साँझ स्वदेश फर्कने कार्यक्रम रहेको छ ।

प्रकाशित मिति: शुक्रबार, चैत ११, २०७८ ०७:३६

प्रतिक्रिया दिनुहोस्