कांग्रेस नेपालगन्ज वडा नम्बर ४ को प्रतिवद्धता : वडाबाट प्राप्त हुने कुनै सेवा सुविधा नलिने, टोलहरुमा फ्रि-वाईफाई जडान

राजनीति

गृहपृष्ठ
राजनीति
कांग्रेस नेपालगन्ज वडा नम्बर ४ को प्रतिवद्धता : वडाबाट प्राप्त हुने कुनै सेवा सुविधा नलिने, टोलहरुमा फ्रि-वाईफाई जडान

कांग्रेस नेपालगन्ज वडा नम्बर ४ को प्रतिवद्धता : वडाबाट प्राप्त हुने कुनै सेवा सुविधा नलिने, टोलहरुमा फ्रि-वाईफाई जडान

मंगलबार, वैशाख २०, २०७९ बागेश्वरी पोस्ट

नेपालगन्ज । नेपाली कांग्रेसको तर्फबाट नेपालगन्ज उपमहानगरपालिका वडा नम्बर ४ का उम्मेदवारले आफ्ना प्रतिवद्धता मतदाता समक्ष प्रस्तुत गरेका छन् । उक्त वडामा कांग्रेसका तर्फबाट वडा अध्यक्षमा प्रदिप शाह (तेली), खुल्ला सदस्यमा उत्तमसिंह सिजापति र मोहम्मद सलिम मुसलमान, महिला सदस्यमा अस्मिता शाह (महतरा) र दलित महिला सदस्यमा सुशिला कोरी उम्मेदवार छन् ।

कांग्रेस नेपालगन्ज वडा नम्बर ४ चुनाव प्रचार प्रसार समितिले सार्वजनिक गरेको प्रतिवद्धता पत्रमा निर्वाचित भएपछि वडाबाट प्राप्त हुने कुनै प्रकारको सेवा सुविधा नलिने, विकासको योजना छनोट र कार्यान्वयन समुदायको सहभागिता तथा सहकार्यबाट गरिने, वडाभित्र रहेको सम्पूर्ण सडकहरुको कालोपत्रे गरिने उल्लेख गरिएको छ ।

यस्तै शैक्षिक बेरोजगारीलाई न्यूनीकरण गर्नका लागि शैक्षिक योग्यताको प्रमाणपत्र धितो राखी ऋण उपलब्ध गराउन पहल गर्ने, वडा नम्बर ४ को अक्षयकोष स्थापना गरिने र गरिव तथा जेहेन्दार बिद्यार्थीलाई छात्रवृत्ति प्रदान गरिने, वडाका टोलहरुमा फ्रि वाईफाई र वडामा हुने सम्पूर्ण गतिविधिको निगरानीका लागि हरेक चोक चोकमा सिसिटीभी क्यामेरा जडान गरिने प्रतिवद्धता पत्रमा समेटिएको छ ।

उक्त वडामा यसपटक नेपाली कांग्रेसले सर्वसम्मत रुपमा आफ्नो उम्मेदवार टुंगो लगाएको थियो । २०७४ सालको निर्वाचनमा पार्टी भित्रैबाट स्वतन्त्र उम्मेदवार हुँदा ब्यहोर्नुपरेको हारको पीडाबाट मुक्त हुन यसपटक सर्वसम्मत रुपमा उम्मेदवार टुंगो लगाइएको हो । वडाअध्यक्षका उम्मेदवार शाह (तेली) ले यसपटक वडामा कांग्रेस एक ढिक्का भएर चुनावी प्रचारमा लागेका कारण जित्ने निश्चित रहेको ठोकुवा गरे ।

उक्त वडामा १० वटा टोल रहेका छन् । वडाका टोल टोलमा पुगेर मतदाता भेट्ने काम भइरहेको महिला सदस्यका उम्मेदवार अस्मिताले जानकारी दिइन् । वडाभित्र हाल ५ हजार ३ सय ६७ मतदाता छन् । त्यसमध्ये आधा बढी मतदाताले कांग्रेसलाई मतदान गर्ने भएकाले जित निश्चित रहेको शाहले दाबी गरिन् ।

प्रकाशित मिति: मंगलबार, वैशाख २०, २०७९ १९:२१

प्रतिक्रिया दिनुहोस्