खजुरामा गठबन्धन उम्मेदवारको संयुक्त प्रचार, उत्साहजनक सहभागिता

राजनीति

गृहपृष्ठ
राजनीति
खजुरामा गठबन्धन उम्मेदवारको संयुक्त प्रचार, उत्साहजनक सहभागिता

खजुरामा गठबन्धन उम्मेदवारको संयुक्त प्रचार, उत्साहजनक सहभागिता

मंगलबार, वैशाख २०, २०७९ बागेश्वरी पोस्ट

खजुरा । बाँकेको खजुरामा गठबन्धन उम्मेदवारको संयुक्त प्रचार प्रसार तिव्र पारिएको छ । नेपाली कांग्रेस र नेकपा (माओवादी केन्द्र) को संयुक्त वाम–लोकतान्त्रिक गठबन्धनका उम्मेदवारले खजुराका विभिन्न वडामा प्रचार प्रसारलाई तिब्रता दिएका हुन् ।

उक्त गठबन्धनका तर्फबाट खजुरा गाउँपालिकाको अध्यक्ष पदमा नेकपा माओदवादी केन्द्रबाट डम्बर विक ‘तुफान’ र नेपाली कांग्रेसका तर्फबाट उपाध्यक्षमा मञ्जु मल्ल उम्मेदवार छन् । निर्वाचन मिति नजिकिएसँगै गठबन्धनका उम्मेदवारको प्रचार प्रसार सशक्त रुपले अगाडि बढेको हो ।

घरदैलो अभियानमा नेपाली कांग्रेस र माओवादी केन्द्रका नेता तथा कार्यकर्ता, सर्बसाधारण लगायतको उत्साहजनक सहभागिता हुने गरेको छ । घरदैलो अभियानका क्रममा गठबन्धनका उम्मेदवारले जनताका समस्या टिपोट गर्दै निर्वाचित भएपछि पूरा गर्ने प्रतिवद्धता जनाइरहेका छन् ।

खजुरा गाउँपालिकामा कांग्रेस र माओवादी गठबन्धन गरेर चुनावी प्रतिस्पर्धामा होमिएका हुन् । खजुरा गाउँपालिकामा नेपाली कांग्रेस र माओवादीले ८ वडा मध्ये ४ वडामा गठबन्धन गरेका छन् । वडा नम्बर १ र ३ मा कांग्रेसले वडा अध्यक्ष तथा २ र ४ नम्बर वडामा माओवादी केन्द्रले वडाअध्यक्षको उम्मेदवार भागबण्डा गरेका छन् । अन्य ४ वडामा भने एकल प्रतिस्पर्धा रहेको छ ।

गठबन्धनका तर्फबाट संयुक्त निर्वाचन परिचालन कमिटी समेत गठन गरेर चुनावी गतिविधि अगाडि बढाइएको छ । जसको संयोजकमा राजकुमार बिक र सहसंयोजकमा रामजी शर्मा छन् ।

प्रकाशित मिति: मंगलबार, वैशाख २०, २०७९ २२:०८

प्रतिक्रिया दिनुहोस्