प्रशान्त उर्जावान, योग्य र सक्षम युवा नेता होः शर्मा

राजनीति

गृहपृष्ठ
राजनीति
प्रशान्त उर्जावान, योग्य र सक्षम युवा नेता होः शर्मा

प्रशान्त उर्जावान, योग्य र सक्षम युवा नेता होः शर्मा

शनिबार, वैशाख २४, २०७९ बागेश्वरी पोस्ट

निर्वाचन आउन अब करिब एक हप्ता बाँकी छ । उम्मेदवारहरु प्रचारप्रसार र घरदैलोमा व्यस्त छन् । बाँकेका ८ वटै स्थानीय तहमा उम्मेदवारले आफ्नो प्रचारप्रसार गरिरहेका छन् । नेपाली कांग्रेसले ८ वटै पालिकामा आफ्ना उम्मेदवारलाई निर्वाचित गराउन आफ्ना सबै संयन्त्र परिचालन गरिरहेको छ । नेपालगन्ज उपमहानगरपालिका र समग्र बाँके जिल्लामा कांग्रेस उम्मेदवारको अवस्था लगायत विविध विषयमा राष्ट्रियसभा सदस्य एवम् कांग्रस बाँकेका पूर्व सभापति युवराज शर्मासँग गरिएको संवाद

तपाईं पनि उम्मेदवारसँगै घरदैलोमा पुगिरहनुभएको छ, कांग्रेसप्रति मतदाताको दृष्टिकोण कस्तो पाउनुभएको छ ?

मतदातामा कांग्रेसप्रति उत्साह देखिन्छ । उहाँहरुको प्रतिक्रियाबाट हाम्रा उम्मेदवार उत्साहित हुनुभएको छ । पछिल्लो समय कांग्रेसप्रति बढी जनलहर देखिएको छ । यो भनेको लोकतन्त्रको सफलता हो । हामीसँग नेपालगन्ज र खजुरामा गठबन्धन बनेको छ । यो गठबन्धन नयाँ प्रयोग हो । यो गठबन्धन सफल भयो भने २० वर्षसम्म जान्छ भनेर प्रचण्डजीले पनि भन्नुभएको छ ।

गठबन्धन गर्नुपर्ने आवश्यकता किन भयो ?

पूर्व प्रधानमन्त्री केपी शर्मा ओलीका कारण गठबन्धन बनेको हो । हाम्रो लडाईं सोचको हो, व्यक्तिगत होइन । हामी जोसँग पनि मिलेर जान सक्छौं । हाम्रो विरोध भनेको राजतन्त्र पुनर्स्थापना गर्नेहरुप्रति हो । ओलीले यसको समर्थन गर्नुभएपछि हामी दुःखी भएका हौँ ।

नेपालगन्ज उपमहानगरपालिकाको निर्वाचनलाई कसरी हेरिरहनुभएको छ ?

हाम्रो प्रतष्स्पर्धा भनेको सोचसँगको हो । संविधान र जनताको अधिकारको रक्षाका लागि हो । विगतमा हामीले एमाले पार्टीलाई पनि हेर्यौं । दुई तिहाईको सरकारलाई पनि हेर्यौं । हामीले राप्रपालाई पनि हेर्यौं । जनता यति अगाडि बढिसक्यो कि पुरातनवादी सोचलाई जनताले अब विश्वास गर्दैनन् । कतिले भ्रष्टाचार गरेका पनि सुनिए । सबैभन्दा ठूलो कमजोरी एमालेले देखायो । त्यसैले पनि यो निर्वाचन कांग्रेसले जित्नैपर्छ भन्ने लाग्छ र महत्वपूर्ण पनि छ । नेपालगन्जको निर्वाचन हाम्रो पक्षमा गइसकेको छ । ठूलो मत अन्तरले हाम्रा उम्मेदवारले चुनाव जित्दै हुनुहुन्छ ।

नेपालगन्जको नगर प्रमुख र उपप्रमुख पदका उम्मेदवार कत्तिको योग्य हुनुहुन्छ ?

मैले सबै उम्मेदवारलाई राम्ररी चिनेको छु । प्रष्ट भाषामा भन्नुपर्दा कांग्रेससहित गठबन्धनका तर्फबाट नगर प्रमुख प्रशान्त विष्ट र उपप्रमुख कमरुद्दिन राई जनताको काम गर्ने ब्यक्ति हुन् । अन्य उम्मेदवार भन्दा म चाहिँ गठबन्धनका उम्मेदवार प्रशान्त विष्ट र कमरुद्दिन राईलाई छनोट गर्छु ।

नेपालगन्ज उपमहानगरपालिकामा जनताले कांग्रेसलाई भोट किन दिने ?

कांग्रेससहित गठबन्धनको साझा उम्मेदवार प्रशान्त विष्ट उर्जावान, योग्य र सक्षम युवा नेता हो । एउटा कारण त उहाँ पहिलेदेखि नै एउटै पार्टीमा भएर काम गर्नुभएको हो । काम गर्न सक्ने क्षमता भएको, जोश जाँगर भएको युवा भएका कारण पनि उहाँलाई सहयोग गर्नुपर्छ । अर्को कारण यसपटक पाँच दलबीच गठबन्धन बनेको छ । यसपटक नजिते कहिले जित्ने ?

विष्टले नगर प्रमुखमा जित्नुभयो भने नेपालगन्जका लागि मुख्य रुपमा के काम गर्न आवश्यक छ ?

यसका लागि त सबैले आआफ्ना योजना सहितका घोषणापत्र सार्वजनिक गरिसक्नुभएको छ । निर्वाचित भएपछि आफूले घोषणा गरेका योजना कार्यान्वयन गर्नुस् । यति भयो भने नेपालगन्जलाई पुग्छ । नेपालगन्ज देशमा एउटा राम्रो नमुना शहर बनोस् ।

प्रकाशित मिति: शनिबार, वैशाख २४, २०७९ १३:१५