चुनावी माहोल कांग्रेसकै पक्षमा तातेको छःबाल्मिकी

राजनीति

गृहपृष्ठ
राजनीति
चुनावी माहोल कांग्रेसकै पक्षमा तातेको छःबाल्मिकी

चुनावी माहोल कांग्रेसकै पक्षमा तातेको छःबाल्मिकी

आइतबार, वैशाख २५, २०७९ बागेश्वरी पोस्ट

स्थानीय तहको निर्वाचन नजिकिँदै गर्दा उम्मेदवारले घरदैलो र भेटघाटलाई तिब्रता दिइरहेका छन् । बाँकेको ८ वटा स्थानीय तहमा उम्मेदवारबीच प्रतिष्पर्धा छ । बाँकेका सबै स्थानीय तहमा कांग्रेसका उम्मेदवारहरु चुनावी मैदानमा छन् । बाँकेमा देखिएको चुनावी माहोल, चुनाव जित्न कांग्रेसको तयारी लगायत विविध विषयमा रहेर नेपाली कांग्रेसका केन्द्रिय सदस्य मैकुलाल बाल्मिकीसँग गरिएको संवादः

१. बाँकेमा चुनावको माहोल कस्तो पाउनुभएको छ ?

बाँकेमा चुनावी माहोल तातेको छ । यतिबेला जनमानस नेपाली कांग्रेसको पक्षमा छ । नेता, कार्यकर्तामा उत्साह छ । कहीँ कतै केही साथीहरुमा असन्तुष्टि होला । तर, निर्वाचनको यो संघारमा आइपुग्दा ती असन्तुष्टिलाई बिर्सेर उहाँहरु पनि गठबन्धनका उम्मेदवार जिताउन लागिपर्नुभएको छ ।

२. पार्टी भित्रका असन्तुष्टि कसरी मेटिए ?

कांग्रेस एउटा ठूलो पार्टी हो । यहाँ धेरै कार्यकर्ताहरुले वर्षौंदेखि मेहनत गरिरहनुभएको छ । पार्टीका कार्यकर्ताको ठूलो लगानी छ । यति ठूलो पार्टीको निर्वाचन परिणाम सफल हुन सकेन भने वा विजयी गराउन सकिएन भने इज्जत र प्रतिष्ठाको कुरा आउँछ । त्यसैले पनि उहाँहरु यतिबेला पार्टी जोगाउन लागिपर्नुभएको छ । टिकटको विषय छोडेर पार्टीलाई जिताउन लागिपर्नुभएको छ । आशा छ, उहाँहरुको देनले पक्कै फल पाउनेछ ।

३. निर्वाचनमा गठबन्धनका उम्मेदवारलाई विजयी गराउनका लागि के–के गरिरहनुभएको छ ?

हामी सबै अहिले कसरी अत्याधिक मत ल्याएर विजयी हुने भनेर केन्द्रित भएका छौँ । प्रत्येक टोल, वडामा दलित, जनजाति लगायत सबै समुदायको घरदैलोमै पुगिरहेका छौं । नेपालगन्जमा गठबन्धनबाट जुझारु उम्मेदवार उठ्नुभएको छ । उहाँहरुको जित निश्चित छ । वडाध्यक्षहरुलाई पनि जिताउनका लागि हामी प्रयास गरिरहेका छौँ । केही वडामा हाम्रो गठबन्धनमा रहेका माओवादी, जसपा कमजोर अवस्था देखिएको छ । त्यहाँ पनि उनीहरुलाई जिताउनका लागि हामी योजना बनाइरहेका छौं । केही वडामा तालमेल गरेर अघि बढ्नका लागि छलफल गरिरहेका छौँ ।

४. नेपालगन्ज उपमहानगरमा गठबन्धनले नै जित्ने आधार के छ ?

कांग्रेस नेपालको एक प्रजातान्त्रिक पार्टी हो । नेपालमा प्रजातन्त्र ल्याउनका लागि पनि योगदान दिएको पार्टी हो । कांग्रेसले नै देशमा भएका परिवर्तनहरुको नेतृत्व लिएको छ । अब नेपालगन्जको विकास र परिवर्तनका लागि पनि कांग्रेसले जित्नु आवश्यक छ । किनकी नेपालगन्ज देशमै एउटा फरक पहिचान बोकेको शहरका रुपमा छ । यहाँका अस्पताललाई शिक्षण अस्पताल बनाउन, युवाहरुलाई रोजगारी दिन, महिला उद्यमी तयार पार्न, स्वास्थ्य खोप, दीर्घकालिन रोगको उपचार गर्न, निःशुल्क स्वास्थ्य परिक्षण लगायतका घोषणापत्रमा उल्लेख गरिएको छ । शहरीकरण र सरसफाईमा जागरुपता ल्याउन, फोहोर व्यवस्थापन लगायतका काममा प्राथमिकता दिइने घोषणापत्रमै उल्लेख छ । सुख्खा बन्दरगाहदेखि लिएर इन्द्रपुर, प्रिपहवा लगायत जोड्ने रिङ रोड बनाउने लगायतका योजना पनि समेटिएका छन् । सुशिल कोइराला प्रधानमन्त्री हुँदा नै नेपालगन्जमा एडिबीको योजना आएको थियो । जसले नेपालगन्जमा विकासको महसुस भएको छ । गठबन्धन निर्वाचित भएका फेरि पनि यस क्षेत्रको विकासका लागि विभिन्न दातृ निकायबाट योजना ल्याउनेछौँ ।

५. निर्वाचित हुनेले नेपालगन्जका लागि के गर्न आवश्यक छ ?

मलाई लाग्छ, यस शहरलाई पर्यटकीय गन्तव्य बनाउनुपर्नेछ । सुशिल कोइराला प्रधानमन्त्री हुँदा यहाँ ठूल्ठूला स्टार लेभलका होटेलहरु खुले । भारतबाट मानसरोवर जानेहरुका लागि नेपालगन्ज गेट वे का रुपमा विकास भयो । भारतबाट मानसरोवर जान आएकाहरुका लागि अब जमुनाहदेखि हिल्सा सम्मको बाटो निर्माण गर्ने योजना नेपालगन्जले ल्याउन सक्छ । यहाँ यति धेरै स्टार लेभलका होटेलहरु छन् । उनीहरुलाई एक÷दुई दिन नेपालगन्जमा बास बसाउने व्यवस्था गर्न सके यहाँको आर्थिक समृद्धिमा टेवा पुग्छ ।

६. जमुनाहदेखि हिल्सा सम्मको बाटो निर्माण गर्ने योजना कत्तिको सम्भव छ ?

सम्भव छ । ट्रयाक खुलिसकेको अवस्था छ । त्यसको व्यवस्थापन गर्न सके भइहाल्छ । यो कामका लागि नेपालगन्ज उपमहानगरपालिकाले पहल गर्न सक्छ । यो बाटो बनोस् भनेर कर्णाली प्रदेशले पनि चाहेको छ । हामीले आँट देखाए सम्भव छ ।

७. अब, अन्त्यमा के भन्न चाहनुहुन्छ ?

नेपाली कांग्रेसले दिएको युवा नेता, प्रौढले माया गरे भने अवश्य जित्छ । यो जित युवाको हो, विकासको हो, नेपालगन्जको हो । युवाहरु यतिबेला उत्साहित छन् । युवाहरुले अब नेतृत्व लिनुपर्छ भन्ने पनि हो । अन्त्यमा निर्वाचनका क्रममा जिल्लामा शान्ति सुरक्षा होस्, इमान्दारी र निष्पक्ष रुपमा मतदान होस्, निर्वाचनमा लोभलालच र प्रलोभनमा पारेर प्रभावित पार्ने काम नहोस् भन्ने जोडदार माग गर्दछु ।

प्रकाशित मिति: आइतबार, वैशाख २५, २०७९ ०८:२४