आचार्य र सुवेदीसहितका उम्मेदवार लखनवाको घरदैलोमा

राजनीति

गृहपृष्ठ
राजनीति
आचार्य र सुवेदीसहितका उम्मेदवार लखनवाको घरदैलोमा

आचार्य र सुवेदीसहितका उम्मेदवार लखनवाको घरदैलोमा

मंगलबार, वैशाख २७, २०७९ बागेश्वरी पोस्ट

कोहलपुर । नेपाली काँग्रेसको तर्फबाट कोहलपुर नगरपालिकाका नगर प्रमुख पदका उम्मेदवार पूर्णप्रसाद आचार्य र उपप्रमुख पदका उम्मेदवार संगिता सुवेदी सहितका उम्मेदवारहरु चुनावी प्रचारका लागि कोहलपुर नगरपालिका–७ लखनवामा निस्किएका छन् ।

वडा अध्यक्ष पदका उम्मेदवार पतिराम थारु, सदस्य पदका उम्मेदवारहरु सविता चौधरी, चवरिया चमार, इन्द्रलाल थारु र लोकबहादुर खड्का सहितका उम्मेदवारहरु घरदैलोमा निस्किएका हुन् । कोहलपुरलाई सम्बृद्ध बनाउने महाअभियानका साथ आचार्य नेतृत्वको टिम मतदातामाझ आफ्ना एजेण्डा सुनाउँदै, मतदाताका समस्या बुझ्दै सुन्दै र सम्वोधनको प्रतिबद्धतासहित चुनावी घरदैलोमा व्यस्त भएको महासमिति सदस्य फुलाराम थारुले जानकारी दिए ।

प्रचारप्रसारका लागि आज अन्तिम दिन भएकाले उम्मेदवारहरुलाई भ्याइनभ्याई भएको छ । आजराती १२ बजेदेखि मौन अवधि सुरु हुँदैछ । त्यसैले पनि उम्मेदवारहरु दवावमा छन् । नगर प्रमुख पदका उम्मेदवार आचार्यले चुनावी प्रचारप्रसारका क्रममा आफू सबैको घरआँगनमा पुग्ने प्रयास गरेको तर समय अभावका कारण कतिपयको घरमा पुग्न नसकेकोमा क्षमा माग्दै मतदानमा सहभागी हुन सबैलाई आव्हान गरेका छन् ।

उनले कोहलपुरलाई सम्बृद्ध, समुन्नत र विकसित सहर बनाउने आफ्नो योजना रहेको भन्दै यसमा साथ दिन सबैलाई आव्हान गरे । कोहलपुर नगरपालिकाको सबैभन्दा कान्छो उम्मेदवार समेत रहेका आचार्यप्रति मतदाताहरुको रुझान समेत लोभलाग्दो देखिएको छ । आचार्यसहितको टोली घरघरमा पुग्दा मतदाताहरुले विजयीको शुभकामना दिँदै भिजन र मिसन भएका युवाहरुलाई जिताउने प्रतिबद्धता जनाउने गरेका छन् ।

प्रकाशित मिति: मंगलबार, वैशाख २७, २०७९ १०:०४