भारतीय सुरक्षाकर्मी 'एसपीजी'को ठुलो फौज गौतमबुद्ध अन्तर्राष्ट्रिय विमानस्थलमा अवतरण

राजनीति

गृहपृष्ठ
राजनीति
भारतीय सुरक्षाकर्मी 'एसपीजी'को ठुलो फौज गौतमबुद्ध अन्तर्राष्ट्रिय विमानस्थलमा अवतरण

भारतीय सुरक्षाकर्मी 'एसपीजी'को ठुलो फौज गौतमबुद्ध अन्तर्राष्ट्रिय विमानस्थलमा अवतरण

बुधबार, वैशाख २८, २०७९ बागेश्वरी पोस्ट

नेपालगन्ज । भारतीय सुरक्षाकर्मीले भरीभराउ भएको भारतीय वायु सेनाको जहाज गौतमबुद्ध अन्तर्राष्ट्रिय विमानस्थल भैरहवामा अवतरण गरेको छ।

भारतीय सुरक्षाकर्मी एसपीजी (स्पेशल प्रोटेक्सन गार्ड) को टोलीले लिएर भारतीय वायु सेनाको विमान गौतमबुद्ध अन्तर्राष्ट्रिय विमानस्थल भैरहवामा अवतरण गरेको विमानस्थल कार्यालयले जनाएको छ । जहाज आज बिहान साढे ८ः२८ बजे भैरहवामा अवतरण गरेको थियो । आगामी जेठ २ गते भारतीय प्रधानमन्त्री नरेन्द्र मोदी नेपालकै प्रसिद्ध धार्मिक एवं पर्यटकीय स्थल लुम्बिनी प्रदेशमा रहेको भगवान् गौतम बुद्ध जन्मस्थल लुम्बिनीमा आउने भएका कारण सुरक्षाका लागि आजै एसपीजीको टोलीले भैरहवा आइपुगेको हो ।

जहाज आज बिहान भारतको राजधानी नयाँ दिल्लीबाट काठमाडौंको त्रिभुवन विमानस्थलमा अवतरण गरेको थियो । काठमाडौं विमानस्थल स्रोतका अनुसार यो जहाज धावनमार्गमा अवतरण गरेसँगै काठमाडौंमा रोकिएन, लगत्तै टेकअफ लिएको जहाज भैरहवास्थित गौतमबुद्ध विमानस्थलमा अवतरण गरेको हो । नयाँ विमानस्थल भएका कारण जहाज सिधै भैरहवा अवतरण नगरी काठमाडौं आएर गरेको हुन सक्ने बताइएको छ ।

मोदीको भ्रमण अवधिलाई सुरक्षा व्यवस्था मिलाउनका लागि जम्बो भारतीय सुरक्षाकर्मी एसपीजी (स्पेशल प्रोटेक्सन गार्ड) लिएर भारतीय वायुसेनाको विमान आज भैरहवामा अवतरण गरेको हो । बुद्ध जयन्तीका लागी लुम्बिनीमा भारतीय प्रधानमन्त्री मोदी आउन लागेका हुन् । प्रधानमन्त्री शेरबहादुर देउवा र मोदीको भेट लुम्बिनीमा हुनेछ ।

यसपटक तीन दिन विशेष कार्यक्रमको आयोजना गरी बुद्ध जयन्ती मनाइँदैछ । मोदीले लामो समयदेखि बुद्ध जयन्तीमा नेपाल आउन चाहिरहेको बताएका थिए । आज अवतरण गरेको जहाज नै गौतमबुद्ध अन्तर्राष्ट्रिय विमानस्थलमा अवतरण गर्ने पहिलो अन्तर्राष्ट्रिय विमान भएको विमानस्थल कार्यालयले बताएको छ । भारतीय सुरक्षाकर्मीलाई छोडेर उक्त वायु सेनाको जहाज आजै दिल्ली फिर्ता जानेछ ।

प्रकाशित मिति: बुधबार, वैशाख २८, २०७९ १६:०३