आज विश्व दूध दिवस मनाइँदै, प्रति व्यक्ति प्रति वर्ष १३ लिटर दूध अभाव

समाचार

गृहपृष्ठ
समाचार
आज विश्व दूध दिवस मनाइँदै, प्रति व्यक्ति प्रति वर्ष १३ लिटर दूध अभाव

आज विश्व दूध दिवस मनाइँदै, प्रति व्यक्ति प्रति वर्ष १३ लिटर दूध अभाव

बुधबार, जेठ १८, २०७९ बागेश्वरी पोस्ट

नेपालगञ्ज । दीर्घ जीवन, गुणस्तरीय दूध तथा दुग्ध पदार्थको सेवन भन्ने नाराका साथ आज विश्व दूध दिवस मनाइँदैछ ।

राष्ट्रिय दुग्ध विकास बोर्डको संयोजकत्वमा आज विभिन्न कार्यक्रम हुँदैछन् । आमनागरिकलाई दूधको उपभोगमा वृद्धि गर्न चेतना फैलाउने उद्देश्यले विश्व दूध दिवस मनाउन थालिएको हो । विश्वका धेरै देशमा सन् २००१ देखि नै दिवस मनाउन थालिए पनि नेपालमा भने सन् २०११ देखि मात्रै मनाउन थालिएको हो ।

संयुक्त राष्ट्र सङ्घ कृषि तथा खाद्य सङ्गठन एफएओको मापदण्ड अनुसार स्वस्थ रहन प्रति व्यक्ति प्रति वर्ष कम्तीमा ९१ लिटर दूध उपभोग गर्नुपर्छ । नेपालमा यो दर ७८ लिटर मात्रै छ । नेपालमा वार्षिक २४ लाख मेट्रिक टन दूध उत्पादन हुन्छ ।

प्रति व्यक्ति प्रति वर्ष १३ लिटर दूध अभाव छ । नेपाललाई २०८० साल सम्ममा दूधमा आत्मनिर्भर बनाउने सरकारको लक्ष्य छ । चालू आर्थिक वर्ष २०७८/७९ को बजेटमा नेपाललाई दुई वर्षभित्र दूधमा आत्मनिर्भर बनाउने प्रतिबद्धता व्यक्त गरिएको थियो । तर, अर्को वर्ष पनि आत्मनिर्भर हुन चुनौती छ ।

राष्ट्रिय दुग्ध विकास बोर्डका निर्देशक डा. राजेन्द्र यादवका अनुसार उत्पादन बढाउन सके केही वर्षभित्रैमा दूधमा आत्मनिर्भर हुन सकिन्छ । अबको एक वर्षमा प्रति व्यक्ति १३ लिटर दूध पुर्याउन सम्भव नरहेको तर दूध उत्पादन बढाउने तथा वितरणलाई व्यवस्थित गर्नुपर्नेमा उनको जोड छ ।

चालू आर्थिक वर्षको आठ महिनामा १ अर्ब ३३ करोड ९ लाख ८६ हजार रुपैयाँ बराबरको दूध तथा दुग्धजन्य पदार्थ आयात भएको सरकारको तथ्याङ्क छ ।

प्रकाशित मिति: बुधबार, जेठ १८, २०७९ ११:१३

प्रतिक्रिया दिनुहोस्