सहिद सेतु विकको शालिक तोडफोडको घटनाप्रति कांग्रेस बाँकेको गम्भीर ध्यानाकर्षण

राजनीति

गृहपृष्ठ
राजनीति
सहिद सेतु विकको शालिक तोडफोडको घटनाप्रति कांग्रेस बाँकेको गम्भीर ध्यानाकर्षण

सहिद सेतु विकको शालिक तोडफोडको घटनाप्रति कांग्रेस बाँकेको गम्भीर ध्यानाकर्षण

शुक्रबार, जेठ २०, २०७९ बागेश्वरी पोस्ट

नेपालगञ्ज । नेपाली कांग्रेस बाँकेले नेपालगञ्ज न्यूरोडस्थित सहिद सेतु विकको शालिक तोडफोड भएको घटनाप्रति आफ्नो गम्भीर ध्यानाकर्षण भएको जनाएको छ । कांग्रेसले उक्त घटनाको घोर निन्दा गरेको छ । सभापति नारायणप्रसाद गौडेलले आज एक विज्ञप्ती निकालेर देशका लागि ज्यान उत्सर्ग गर्ने सम्पूर्ण सहिदहरुको अपमान हुने गरी अराजक शैलीमा विहिबार भएको उक्त घटनाले सबैलाई लज्जित बनाएको उल्लेख गरेका छन् ।

विज्ञप्तीमा भनिएको छ, "लोकतान्त्रिक गणतन्त्र स्थापनाका खातिर आफ्नो ज्यानको प्रवाह नगरी सहादत प्राप्त गरेकी सहिदको शालिकमाथि अराजक शैलीमा तोडफोड गर्नु किमार्थ क्षम्य हुन सक्दैन । नेपाली कांग्रेस बाँके यस प्रकारको जघन्य हर्कतको कडा शब्दमा निन्दा गर्दछ ।"

सभापति गौडेलले आफ्नो ज्यानको प्रवाह नगरी देश र जनताको लागि बलिदानी दिने सहिद सेतु विकप्रति सदा उच्च सम्मान प्रकट गर्नु सबैको दायित्व भएको बताएका छन् । उनले अगाडि भनेका छन्, "तपाईं हामीलाई आफ्नो दायित्वबाट ज्युत हुने अधिकार कदापी छैन । सहिद सेतु विकको शालिक तोडफोड गर्नेमाथि कडा कारवाही गर्न नेपाली कांग्रेस बाँके जोडदार माग गर्दछ ।"

जनआन्दोलन २०६२/६३ मा सहभागी भई राज्य व्यवस्था परिवर्तनका लागि सहादत प्राप्त गरी राज्यबाट सहिद घोषणा भएकी सहिद सेतु विकको शालिक उनले मृत्युबरण गरेकै स्थानमा स्थापना गरिएको हो ।

यस्तै धम्बोझी चोकमा भएको घटनाप्रति पनि कांग्रेसले ध्यानाकर्षण भएको उल्लेख गरेको छ । विज्ञप्तीमा भनिएको छ, "२०७९ साल जेठ १९ गतेकै दिन नेपालगञ्जको धम्बोझी चोकमा पूर्व राजा स्वर्गीय विरेन्द्र शाहको शालिक राख्ने विषयमा उत्पन्न असहज परिस्थितिप्रति पनि नेपाली कांग्रेस बाँकेको गम्भीर ध्यानाकर्षण भएको छ । धार्मिक एवम् सामाजिक सद्भावका हिसाबले एक नमुना सहरका रुपमा परिचय बनाएको नेपालगञ्जलाई विथोल्ने गरी भएको उक्त असहज परिस्थितिले हामीलाई चिन्तित बनाएको छ ।"

No description available.

बाँके कांग्रेसले धार्मिक एवम् सामाजिक सद्भावको सहरका रुपमा नेपालगञ्जको चिनारीलाई बरकरार राख्न सबै संवदनशील बन्नुपर्ने बताएको छ । विज्ञप्तीमा लेखिएको छ, "सद्भाव खल्बल्याउने चेष्टा कहीँकतैबाट हुनु हामी सबैको चिन्ताको विषय हो । आगामी दिनहरुमा यस्ता कार्यहरु कसैबाट पनि हुने छैनन् भन्ने विश्वासका साथ सम्पूर्ण नेपालगञ्जबासीलाई एकताबद्ध भएर अघि बढ्न आह्वान गर्दछौं । उक्त घटनामा घाइते भएका सबैको शिघ्र स्वास्थ्य लाभको कामना पनि गर्दछौं ।"

प्रकाशित मिति: शुक्रबार, जेठ २०, २०७९ २०:०५