अन्तर्घात गरेको भन्दै बाँकेमा कांग्रेसका १०४ जनालाई स्पष्टीकरण सोधिने

राजनीति

गृहपृष्ठ
राजनीति
अन्तर्घात गरेको भन्दै बाँकेमा कांग्रेसका १०४ जनालाई स्पष्टीकरण सोधिने

अन्तर्घात गरेको भन्दै बाँकेमा कांग्रेसका १०४ जनालाई स्पष्टीकरण सोधिने

सबैभन्दा बढी डुडुवाका ४७ जना, जिल्ला सहसचिव थारु पनि लिष्टमा

शनिबार, असार ११, २०७९ बागेश्वरी पोस्ट

नेपालगञ्ज । बाँकेमा नेपाली कांग्रेसका १०४ जना नेता कार्यकर्ताहरुलाई स्पष्टीकरण सोधिने भएको छ । नेपाली कांग्रेस जिल्ला अनुशासन समिति बाँकेको असार ७ गते बसेको बैठकको निर्णय अनुसार पार्टीका आधिकारिक उम्मेदवारलाई अन्तर्घात गरेको भन्दै १०४ जनालाई स्पष्टीकरण सोधिने भएको हो ।

अनुशासन समितिका संयोजक टंकप्रसाद काफ्ले आशिषले बैशाख ३० गते सम्पन्न स्थानीय तहको निर्वाचनमा नेपाली कांग्रेसका आधिकारिक उम्मेदवारहरुलाई असहयोग गरेको निवेदन सिफारिसका आधारमा स्पष्टीकरण सोध्ने निर्णय भएको बताए । उनले अनुशासन समितिमा नेपाली कांग्रेसका आधिकारिक उम्मेदवार, वडा कार्यसमिति तथा क्षेत्रबाट निवेदन सिफारिस भएका आधारमा कांग्रेसको विधान २०१७ (संशोधन सहित) को धारा ३४(४)(ङ) बमोजिम ७ दिने स्पष्टीकरण माग गरिने जानकारी दिए ।

स्पष्टीकरण सोधिनेमा सबैभन्दा बढी डुडुवाका ४७ जना छन् । यस्तै नेपालगञ्जका १६ जना, नरैनापुरका १४ जना, राप्तीसोनारीका ८ जना, खजुराका ७ जना, कोहलपुरका ६ जना र बैजनाथका ६ जना छन् । संयोजक काफ्लेका अनुसार नेपाली कांग्रेस बाँकेको सहसचिव विनोद कुमार थारुलाई पनि स्पष्टीकरण सोधिने भएको छ । उनका विरुद्ध पनि निवेदन परेको छ ।

जिल्ला सदस्य शरदचन्द्र बर्मा, नेपालगञ्ज २० का बुथ सभापति जोगेन्द्र प्रसाद यादव, डुडुवा ६ का बुथ सभापति बाबुलाल यादव, नरैनापुर ५ का बुथ सभापति मुनब्बर अली मुकेरी, ६ का बुथ सभापति राम अचल मुराउ (मौर्य), वडा नम्बर १० का निवर्तमान वडा अध्यक्ष विन्दुभुषण बस्नेत, पूर्व महाधिवेशन प्रतिनिधि सचेन्द्र कुमाार चौधरी लगायत पनि स्पष्टीकरण सोधिनेहरुको लिष्टमा परेका छन् ।

उनीहरुलाई भोलीदेखि स्पष्टीकरण पत्र पठाइने बताइएको छ । उनीहरुले पत्र पाएको ७ दिनभित्र स्पष्टीकरण दिनुपर्ने हुन्छ ।

क-कसलाई स्पष्टीकरण सोधिँदैछ ? (हेर्नुस नामावली)

No photo description available.