पौडेल निकट जिल्ला सभापतिहरुको देउवा समूहसँग ४ बुँदे ध्यानाकर्षण

राजनीति

गृहपृष्ठ
राजनीति
पौडेल निकट जिल्ला सभापतिहरुको देउवा समूहसँग ४ बुँदे ध्यानाकर्षण

पौडेल निकट जिल्ला सभापतिहरुको देउवा समूहसँग ४ बुँदे ध्यानाकर्षण

सोमबार, पुस २१, २०७६ बागेश्वरी पोस्ट

काठमाडौं । नेपाली कांग्रेसमा सभापति शेरबहादुर देउवाको एकल निर्णयविरुद्ध असन्तुष्ट नेताहरुले जिल्ला सभापतिहरुको छुट्टै भेलाले ४ बुँदे ध्यानाकर्षण गरेको छ । सोमबार पार्टी मुख्यालय सानेपाको कार्यकक्ष प्रयोग गरेर आयोजित भेलामा सहभागी जिल्ला सभापतिहरुले सभापति देउवासमक्ष चार बुँदे ध्यानाकर्षण पत्र बुझाएका हुन् ।

वरिष्ठ नेता रामचन्द्र पौडेलको नेतृत्वमा आयोजित जिल्ला सभापतिहरुको भेलाले ११ पुसमा सभापति देउवाले एकलौटी रुपमा महाधिवेशनको मिति घोषणा, विभाग बिस्तार लगायतका निर्णयहरु गरेको भन्दै असन्तुष्टि व्यक्त गरेका छन् ।

सानेपामा जारी भेलामा ५१ जिल्लाका सभापतिहरु जम्मा भएका छन् । पौडेललाई साथ दिँदै महामन्त्री शशांक कोइराला र कोषाध्यक्ष सितादेवी यादव पनि उपस्थित छन् । जिल्ला सभापतिहरुले पुष ११ गते गरिएको निर्णयबाट पार्टी परम्परा, संस्कार, लोकतान्त्रिक उच्च मूल्य र आफैंद्वारा पारित विधानको परिधि बाहिर धकेलिएको महसुस गरेको बताएका छन् ।

पौडेल समूहको भेलामा नेता कृष्ण सिटौलाले नेतृत्व गरेको समूह पनि सहभागी भएको छ । सिटौलासमूहका नेताहरु गगन थापा र प्रदीप पौडेल पनि बैठकमा सहभागी भए पनि सिटौला स्वयम् भने अनुपस्थित छन् ।

पार्टीको केन्द्रीय कार्यालयमा बहुमत सभापति जम्मा पारेर कार्यक्रम आयोजना गर्नुलाई पार्टीको केन्द्रीय कार्यालय कब्जा गरेको रुपमा पनि कतिपय सहभागीले अर्थ्याएका छन् ।