बर्दिया अदालतका न्यायाधीश लोकजंग शाहसहित दुई न्यायाधीश पदमुक्त !

समाचार

गृहपृष्ठ
समाचार
बर्दिया अदालतका न्यायाधीश लोकजंग शाहसहित दुई न्यायाधीश पदमुक्त !

बर्दिया अदालतका न्यायाधीश लोकजंग शाहसहित दुई न्यायाधीश पदमुक्त !

आइतबार, साउन १, २०७९ बागेश्वरी पोस्ट

नेपालगञ्ज । न्याय परिषद्ले दुई जना न्यायाधीशलाई पदमुक्त गर्न सिफारिस गरेको छ । परिषद्ले बर्दिया जिल्ला अदालतका न्यायाधीश लोकजंग शाह र उच्च अदालत सुर्खेतको जुम्ला इजलासका नसरुल्लाह अन्सारीलाई खराब आचरण र कार्यक्षमताको अभाव पाइएपछि पदमुक्त गर्न सिफारिस गरेको हो ।

परिषद्का प्रवक्ता मानबहादुर कार्कीका अनुसार शाह र अन्सारी विरूद्ध परेका उजुरीमाथि अनुसन्धान र उनीहरूले गरेका फैसला अध्ययनपछि दोषी पाइएकाले पदमुक्त गर्ने सिफारिस गरिएको हो । परिषद्को सिफारिस अनुसार कामु प्रधान न्यायाधीश दीपककुमार कार्कीले उनीहरू दुवै जनालाई आज पदमुक्त गर्दैछन् ।

नवलपरासीका अन्सारी २०७३ पुस २९ मा सिधै उच्च अदालतको न्यायाधीश नियुक्त भएका थिए । त्यस्तै रुकुमका शाह २०४३ साउन २६ मा न्याय सेवा प्रवेश गरेर २०६६ भदौ २३ मा जिल्ला न्यायाधीश नियुक्त भएका थिए । करिब १३ वर्षदेखि एउटै पदमा रहेका शाह हालका जिल्ला न्यायाधीशहरूमा पुराना मध्येका एक हुन् ।

त्यसैगरी परिषद्ले उच्च अदालत तुलसीपुरकी न्यायाधीश बबिता उप्रेतीलाई सचेत गराउने पनि निर्णय गरेको छ । उनले गरेका फैसला अध्ययनपछि कार्यक्षमताको अभावमा उनलाई सचेत गराउने निर्णय गरिएको प्रवक्ता कार्कीले बताए । काठमाडौंकी उप्रेती पनि अन्सारीसँग एकैदिन अर्थात् २०७३ पुस २९ मा सिधै उच्च अदालतको न्यायाधीश नियुक्त भएकी थिइन् ।

परिषद्ले अघिल्लो साता उच्च अदालत तुलसीपुरको बुटवल इजलासकी न्यायाधीश रेणुका साहलाई बर्खास्त गरेको थियो । धनुषाकी साहले योग्यता ढाँटेर नियुक्ति लिएको भन्दै असार २४ मा उनलाई बर्खास्त गर्ने निर्णय गरेको थियो ।

१० वर्ष निरन्तर वकालत गरेको वा कानुनको क्षेत्रमा काम गरेको व्यक्तिका रूपमा नियुक्त भएकी साहले २० वर्ष सीटीईभीटीमा सामान्य प्रशासन सेवाको जागिरे भएर बिताएकी थिइन् । साह पूर्व प्रधान न्यायाधीश रामकुमारप्रसाद साहकी छोरी हुन् ।

प्रकाशित मिति: आइतबार, साउन १, २०७९ ०७:५०

प्रतिक्रिया दिनुहोस्