एक महिना यार्सागुम्बा टिपेर वर्षभरिको जोहो

समाचार

गृहपृष्ठ
समाचार
एक महिना यार्सागुम्बा टिपेर वर्षभरिको जोहो

एक महिना यार्सागुम्बा टिपेर वर्षभरिको जोहो

यार्सागुम्बा निकासी बढ्यो, दुई करोड राजस्व सङ्कलन

सोमबार, साउन २, २०७९ बागेश्वरी पोस्ट

दार्चुला । अपि हिमाल गाउँपालिका–२ का गोविन्दसिंह कार्की सानैदेखि यार्सागुम्बा टिपेर आफ्नो खर्च जुटाउँछन् । उनी वर्षका १२ महिना मध्ये एक महिना उच्च हिमाली भेगमा यार्सागुम्बा टिप्न जाँदा वर्षभरिलाई खर्च जुटाउँछन् ।

पढाई सामान्य साक्षर मात्र गरेका कार्की यार्सागुम्बाकै कारण परिवारको जोहो चलाउँछन् । घरमा दुई बुढाबुढी छन् । आयस्रोतका रुपमा यार्सागुम्बा मात्रै हो । खेतीपाती गरेर वर्षभरि खान नपुगे पनि यार्सागुम्बाका कारण एक महिना कडा मेहनत गरे वर्षभरि खान लगाउन पुग्ने उनी सुनाउँछन् ।

"एक महिना यार्सागुम्बा सङ्कलन गरेर झण्डै चार लाख रुपैयाँ कमाइ भयो, " उनले भने-"जङ्गलमै वर्षभरिको कमाई हुन्छ भने मजदुरी गर्न भारत किन जानुपर्यो, त्यो बाहेक सानातिना काम गाउँका योजनामा गरिन्छ ।"

यार्सागुम्बाकै कारण पछिल्लो समय भारतमा मजदुरी गर्न जाने कोही हुँदैनन् । यार्सागुम्बाको समयमा महिला, पुरुष, स्कुले बालबालिका यार्सागुम्बा सङ्कलनमा लेकतिर जाने गर्छन् । दुई वर्ष कोरोनाका कारण यार्सागुम्बा सङ्कलनमा समेत असर पर्यो । यस वर्ष यार्सागुम्बा वैशाखमै सङ्कलन भयो । सङ्कलन गरेकाहरुले अहिले यार्सागुम्बा बिक्री गरिसकेका छन् ।

अपि हिमाल–१ का ललित जाग्रीले भने, "एक महिना मेहनत गर्यो भने वर्षभरि खान लगाउन पुगिहाल्छ, भारतमा मजदुरी गर्न वा बाह्यमूलक किन जानुपर्यो रु यार्सागुम्बा मात्र नभई सतुवा, वन लसुन लगायतका थुप्रै जडीबुटी यो क्षेत्रमा पाइन्छन् ।"

यार्सागुम्बा खरिद गर्न व्यापारी गाउँगाउँमा व्यापारी पुगेका छन् । व्यापारी आफैँ घरघरमा पुगेर स्थानीयबाट यार्सागुम्बा खरिद गर्ने गर्छन् । यस वर्ष व्यापारीले प्रति तोला १५ हजार रुपैयाँदेखि १८ हजार रुपैयाँ हालेर यार्सागुम्बा खरिद गरेका छन् । विगतको भन्दा स्थानीयले यस पटक यार्सागुम्बाको मूल्य राम्रो पाएका छन् । यार्सागुम्बा खरिद गर्न व्यापारीको प्रतिस्पर्धा नै चल्छ । स्थानीय धनसिंह जाग्री जिल्लाभरिबाट अहिले यार्सागुम्बा सङ्कलनको काम भइरहेको बताउँछन् । जिल्लाबाट सबैभन्दा बढी यार्सागुम्बाको व्यापार गर्दै आएका जाग्री यस पटक व्यापारी पनि विगतको तुलनामा गाउँमा बढी पुगेको बताउँछन् ।

यार्सागुम्बा निकासी बढ्यो, दुई करोड राजस्व सङ्कलन

अपि नाम्पा संरक्षण क्षेत्रबाट यस वर्ष यार्सागुम्बा निकासी बढेको छ । दुई वर्ष कोरोनाका कारण यार्सागुम्बा निकासी घटेकामा यस वर्ष दोब्बरले बढेको हो । एकदेखि डेढ महिना अपि हिमाल गाउँपालिकाको सातगङ्गा, चाइमेटला, लोलु, रोखापु, धरमघर र काटै तथा व्यास गाउँपालिकाको अपि फेद, दूधीवन लगायतका वनमा यार्सागुम्बा सङ्कलन भएको हो ।

जिल्लाबाट यस वर्ष असारसम्म ७ सय २२ किलोग्राम यार्सागुम्बाको छोडपुर्जी जारी भएको छ । अपि नाम्पा संरक्षण क्षेत्र कार्यालयले यार्सागुम्बाको छोडपुर्जीबाट प्रतिकिलो ३० हजार रुपैयाँका दरले कुल २ करोड १६ लाख ६० हजार रुपैयाँ राजस्व सङ्कलन गरेको अपि नाम्पा संरक्षण क्षेत्रका सूचना अधिकारी इन्द्रसिंह नगारीले जानकारी दिए ।

अपि नाम्पा संरक्षण क्षेत्र कार्यालयले सबैभन्दा बढी यार्सागुम्बाबाटै राजस्व सङ्कलन गर्ने गरेको छ । दुई वर्ष कोरोना भाइरसको महामारीका कारण यार्सागुम्बा सङ्कलन र निकासी घटेको थियो । यार्सागुम्बा सङ्कलन र निकासी घट्दा राजस्व पनि घट्दै गएको कार्यालयको यस वर्ष राजस्वदर अझै बढ्ने अनुमान गरिएको छ ।

अपि नाम्पा संरक्षण क्षेत्र कार्यालयका अनुसार आर्थिक वर्ष २०७३/७४ मा ६ सय ६९ किलो, २०७४/७५ मा ७ सय ६४ किलो, २०७५/७६ मा ५ सय ४५ किलो, २०७६/७७ मा ३ सय २७ किलो र २०७७/७८ मा ३ सय ५ किलोग्राम यार्सागुम्बा जिल्लाबाट निकासी भएको थियो । रासस

प्रकाशित मिति: सोमबार, साउन २, २०७९ १४:३२