लामो समयपछि परेको पानीले बाँकेका किसानलाई दियो खुसी

समाचार

गृहपृष्ठ
समाचार
लामो समयपछि परेको पानीले बाँकेका किसानलाई दियो खुसी

लामो समयपछि परेको पानीले बाँकेका किसानलाई दियो खुसी

बुधबार, साउन ४, २०७९ बागेश्वरी पोस्ट

नेपालगञ्ज । लामो समय पश्चात् बर्षात भएपछि बाँकेका किसानहरु खुशी भएका छन् । पानी नपर्दा बाँकेमा रोपाइँ प्रभावित भएको थियो । धानको ब्याड छिप्पिन थालेपछि किसानहरु तनावमा थिए ।

यस्तै रोपिएको धान पनि सुक्न थालेको थियो । खेतमा धाँजा फाटेको थियो । असार सकिँदा ४६ प्रतिशत मात्रै रोपाइँ भएको थियो । लामो समयपछि पानी परेपछि किसानहरु हर्षित भएका छन् । उनीहरु बाँकी रोपाइँ पूरा हुने भएपछि खुसी भएका हुन् । मानो खाएर मुरी फलाउने किसानले आकाशमै हेरेर दिन बिताएका थिए ।

कुलो, बोरिङ र सिक्टा नहरको पानी आउने ठाउँका किसानले धान रोपाइँ गरिसकेका छन् । बाँकेमा ठूलो भूभागमा आकाशे पानीको भरमा खेती गरिन्छ । कृषि ज्ञान केन्द्र बाँकेका प्रमुख सागर ढकालले साउनको ३ गतेसम्म आइपुग्दा मुस्किलले ४६ प्रतिशत रोपाइँ भएको बताए । बुधवार विहानैदेखि बर्षा शुरु भएकाले अब धमाधम रोपाइँ शुरु हुने उनको विश्वास छ ।

बाँकेमा ३६ हजार ५ सय हेक्टरमा धान खेती हुन्छ । राम्ररी पानी परेको बेलामा पनि यहाँको प्रतिकठ्ठा उत्पादन डेढ क्वीन्टल हाराहारीमा छ । यो वर्ष समयमा पानी नै नपरेकाले धान उत्पादन घट्ने निश्चित जस्तै भएको ढकालको भनाई छ । बाँकेमा असार १५ गते राम्ररी पानी परेको थियो । त्यसपछि अलिअलि पानी परे पनि रोपाइँ नै हुने गरी पानी परेको थिएन ।

प्रकाशित मिति: बुधबार, साउन ४, २०७९ १५:१२

प्रतिक्रिया दिनुहोस्