प्रेस युनियनको नवौं महाधिवेशन हेटौंडामा सुरु

राजनीति

गृहपृष्ठ
राजनीति
प्रेस युनियनको नवौं महाधिवेशन हेटौंडामा सुरु

प्रेस युनियनको नवौं महाधिवेशन हेटौंडामा सुरु

संस्थापन र संस्थापन इतरवीच कडा प्रतिष्पर्धा

शुक्रबार, साउन ६, २०७९ बागेश्वरी पोस्ट

हेटौंडा । नेपाल प्रेस युनियनको नवौं राष्ट्रिय महाधिवेशनमा संस्थापन पक्ष र संस्थापन इतर पक्ष बीच कडा प्रतिस्पर्धा हुने देखिएको छ ।

प्रधानमन्त्री समेत रहेका नेपाली कांग्रेसका सभापति शेरबहादुर देउवाले महाधिवेशन उद्घाटन गरेका हुन् । महाधिवेशन उद्घाटन गर्दै देउवाले निकट भविष्यमा हुन लागेको चुनाव स्वच्छ, मर्यादित र भयरहित वातावरणमा सम्पन्न गर्नका लागि सहयोग पुग्ने गरी कलम चलाउन पत्रकारलाई अनुरोध गरेका छन् ।उनले सरकार छिट्टै प्रतिनिधि सभा र प्रदेश सभाको चुनाव गर्ने तयारीमा रहेको बताए ।

हरेक परिवर्तनमा प्रेसले महत्वपूर्ण भूमिका निर्वाह गरेको उल्लेख गर्दै उनले कोरोनाकालमा नेपालको सञ्चार क्षेत्रले निभाएको भूमिकाको प्रशंसा गरे । महाधिवेशनलाई उपसभापतिद्वय पूर्णबहादुर खड्का र धनराज गुरुङ, महामन्त्रीद्वय गगन थापा र विश्वप्रकाश शर्मा, सहमहामन्त्री महालक्ष्मी उपाध्याय, प्रवक्ता डा. प्रकाशशरण महत, बागमती प्रदेश सभापति इन्द्र बानियाँ लगायतले सम्बोधन गरेका छन् ।

झन्डै ८ वर्ष पछि हुन लागेको महाधिवेशनमा भाग लिनका लागि प्रतिनिधिहरु हेटौंडा आइपुगेका छन् । १ हजार ६ सय ३० प्रतिनिधिले आगामी तीन वर्षका लागि नयाँ नेतृत्व चयन गर्नेछन् ।

नेपाली कांग्रेसको शुभेच्छक संस्था प्रेस युनियनको भावी नेतृत्वका लागि संस्थापन पक्षबाट अध्यक्षमा अनिता बिन्दु र संस्थापन इतर पक्षवाट शिव लम्साल उम्मेदवार बन्दैछन् । उद्घाटन सत्रपछि आजै निर्वाचनको प्रक्रिया पनि शुरु हुनेछ । भोलि मतदान हुने र भोलि नै मत परिणाम सार्वजनिक गर्ने कार्यतालिका रहेको छ ।

महाधिवेशनमा संस्थापन पक्षवाट बरिष्ठ उपाध्यक्षमा सरोज अधिकारी र संस्थापन इतर समूहबाट प्रेम केसीले उम्मेदवारी घोषणा गरेका छन् भने खुल्ला उपाध्यक्षका लागि भिष्मराज ओझा र शेखर रेग्मीले चुनावी मैदानमा उत्रने घोषणा गरेका छन् ।

उता, संस्थापन पक्षबाट महिला उपाध्यक्षमा कल्पना शर्मा र इतर समूहबाट सलोजा दाहालबीच कडा प्रतिस्पर्धा हुने देखिएको छ भने महासचिवमा संस्थापन पक्षवाट जगन्नाथ दुलाल र इतर समूहबाट दिलिप पौडेलबीच तीव्र प्रतिस्पर्धा हुने देखिएको छ । महासचिवमा खिला कार्कीले पनि उम्मेदवारी घोषणा गरेका छन् ।

संस्थापन पक्षले कोषाध्यक्षमा माधव धिताललाई उम्मेदवार खडा गरेको छ भने उनीसँग रमेश वाग्ले प्रतिस्पर्धामा रहनेछन् । उपमहासचिवमा युवराज गौतम, रविन्द्र सुवेदी, सन्तोष रेग्मी, केशव साउद लगायतले उम्मेदवारी घोषणा गरेका छन् । महिला उपमहासचिवमा सुलोचना गौतम, कुसुम बिक, दिलिपाश्री अधिकारीले उम्मेदवारी घोषणा गरेका छन् ।

प्रकाशित मिति: शुक्रबार, साउन ६, २०७९ १४:३७