नेपालमा बाघको संख्या ३५५, दोब्बर बनाउन गरेको संकल्प पूरा

समाचार

गृहपृष्ठ
समाचार
नेपालमा बाघको संख्या ३५५, दोब्बर बनाउन गरेको संकल्प पूरा

नेपालमा बाघको संख्या ३५५, दोब्बर बनाउन गरेको संकल्प पूरा

बाँके राष्ट्रिय निकुञ्जमा २५ वटा बाघ पुगे

शुक्रबार, साउन १३, २०७९ बागेश्वरी पोस्ट

नेपालगञ्ज । नेपालमा बाघको संख्या ३ सय ५५ पुगेको छ । अन्तर्राष्ट्रिय बाघ दिवसको अवसर पारेर आज प्रधानमन्त्री शेरबहादुर देउवाले चौथो राष्ट्रिय बाघ गणनाको नतिजा सार्वजनिक गरेका हुन् । गत मंसिर १९ गते सुरू भएर फागुन २८ गते बाघ गणना सम्पन्न भएको थियो ।

बाघको संख्या ३ सय ५५ पुगेसँगै नेपालले सन् २०२२ सम्ममा संख्या दोब्बर बनाउन गरेको संकल्प पनि पूरा भएको छ । सबैभन्दा धेरै बाघ चितवनमा राष्ट्रिय निकुञ्जमा पाइएका छन् । यहाँ १२८ वटा बाघ छन् । त्यसैगरी बर्दिया राष्ट्रिय निकुञ्जमा १२५ बाघ पाइएका छन् । बाँकेमा २५, पर्सामा ४१ र शुक्लाफाँटामा ३६ वटा बाघ पाइएका हुन् ।

बाघ गणनाका लागि चितवन-पर्सा, बाँके-बर्दिया र शुक्ला-लालझाडी-जोगबुढा गरेर तीन वटा कम्पलेक्समा विभाजन गरेर गणना गरिएको थियो । बाघ गणनामा राष्ट्रिय निकुञ्ज तथा वन्यजन्तु संरक्षण विभागले 'टाइगर एन्ड प्रे-बेस मोनिटरिङ प्रोटोकोल, २०१७' ले निर्दिष्ट गरे अनुसार 'क्यामेरा ट्रायापिङ' र 'अकुपेन्सी सर्भे विधि' अपनाएर गरेको थियो ।

सन् २०१० मा रुसको सेन्ट पिटर्सवर्गमा बाघ पाइने देशहरूले दोब्बर बनाउने संकल्प गर्दै महत्वपूर्ण निर्णय गरेका थिए । नेपालले यो लक्ष्य सन् २०१८को गणनामा झन्डै हासिल गरेको थियो । सन् २०१० नेपालमा १२१ बाघ थिए, सन‍् २०१३ को गणनामा १९८ पुगेको थियो भने सन् २०१८ मा बाघको संख्या २३५ पुगेका थिए । सन् २०१८ को गणनामा चितवनमा ९३, बर्दियामा ८७, बाँकेमा २१, पर्सामा १८ र शुक्लाफाँटामा १६ वटा बाघ पाइएको थियो ।

नेपाल बाहेक भारत, चीन, भुटान, रुस, ब‌ंगलादेश, भियतनाम, म्यानमार, मलेसिया, इन्डोनेसिया,थाइल्यान्ड र लाओसमा पाटे बाघ पाइन्छन् ।

नेपालमा बाघको सं‌ख्या बढेसँगै यिनको व्यवस्थापन, मानव वन्यजन्तु द्वन्द न्यूनीकरण, बासस्थान सुधार लगायत अन्य विविध विषय चुनौती बनेका छन् । मध्यवर्ती क्षेत्रका मानिसहरु घाँस दाउरा, निहुरो टिप्‍न र गार्इभैंसी चराउन जाने क्रममा सामुदायिक वनभित्रै बाघको आक्रमणमा पर्ने गरेका छन् । उनीहरुलाई जंगल जाने वातावरणा नबनाउनका लागि सरकारले वैकल्पिक उपायको व्यवस्था मिलाउने किसिमका कार्यक्रमहरू पनि आवश्यकता देखिएको छ ।

बाघको संख्या दोब्बर भएसँगै सरकारले बाघ विशेष कार्यक्रम पनि ल्याउने तयारी गरेको छ ।

प्रकाशित मिति: शुक्रबार, साउन १३, २०७९ १०:४२

प्रतिक्रिया दिनुहोस्