पार्टी हित विपरीत क्रियाकलाप गर्नेहरुप्रति निर्मम बन्न जरुरी छ: सभापति पुन

राजनीति

गृहपृष्ठ
राजनीति
पार्टी हित विपरीत क्रियाकलाप गर्नेहरुप्रति निर्मम बन्न जरुरी छ: सभापति पुन

पार्टी हित विपरीत क्रियाकलाप गर्नेहरुप्रति निर्मम बन्न जरुरी छ: सभापति पुन

शनिबार, साउन १४, २०७९ बागेश्वरी पोस्ट

नेपालगञ्ज । नेपाली कांग्रेसका लुम्बिनी प्रदेश सभापति अमरसिंह पुनले पार्टीको विधान विपरीत विभिन्न संघसंस्थामा आबद्ध हुने तर पार्टीको कार्यक्रममा नआउनेहरुलाई कारवाहीका लागि सिफारिस गर्न निर्देशन दिएका छन् ।

नेपाली कांग्रेस बाँकेले पार्टीबाट निर्वाचित जनप्रतिनिधिहरुसंग आज नेपालगञ्जमा आयोजना गरेको परामर्श तथा समन्वयात्मक कार्यक्रमलाई सम्बोधन गर्दै सभापति पुनले पार्टीको विधानलाई चुनौती दिएर पार्टी हित विपरीतका क्रियाकलाप गर्ने नेता कार्यकर्ताविरुद्ध पार्टी निर्मम ढंगले प्रस्तुत हुने बताए । उनले पार्टीलाई विधि विधान अनुसार चलाउँदा कसैले पनि असहयोग गर्न नहुने भन्दै आफ्नै उम्मेदवारलाई हराउन भूमिका खेल्नेप्रति नरम हुन नसकिने स्पष्ट पारे ।

सभापति पुनले कांग्रेसलाई बलियो बनाउने गरी लाग्न नेता कार्यकर्ताहरुलाई निर्देशन दिए । उनले पार्टीका गाउँ, वडा, नगर कमिटीमा समस्या भए अवगत गराउन आग्रह गर्दै समस्या समाधानका लागि भूमिका खेल्ने बताए । सभापति पुनले आग्रह पालेर पार्टी नबन्ने भन्दै सबै एकजुट भएर अघि बढ्नुपर्ने उल्लेख गरे ।

उनले जनप्रतिनिधिहरुलाई पार्टीसंग समन्वय गरेर अघि बढ्न आग्रह गर्दै जनताको पक्षमा काम गर्न दृढतापूर्वक लाग्नुपर्नेमा जोड दिए । उनले संघ र प्रदेशको निर्वाचनमा सत्तारुढ दलहरुसंग चुनावी तालमेल गर्दा कांग्रेसको बहुमत आउने गरी गर्न आफूहरुले केन्द्रीय कार्यसमितिलाई सुझाब दिएको बताए । कांग्रेसको अस्तित्व कमजोर हुने गरी गठबन्धन गर्न नहुने भन्दै उनले आवश्यकता र औचित्यका आधारमा मापदण्ड तय गरिनुपर्ने बताए ।

कार्यक्रममा नगर प्रमुख, उपप्रमुख, पालिका अध्यक्ष, उपाध्यक्ष, वडा अध्यक्ष लगायत जनप्रतिनिधिहरुकाे उल्लेख्य सहभागिता थियाे । पार्टी संगठनलाई संस्थागत, नियमित संचालन गर्न उपस्थित वडा सभापतिहरुलाई पार्टीको बिधान नियमावली, लेटरप्याड र स्थानीय तहकाे घाेषणापत्र समेत हस्तान्तरण गरिएकाे थियाे । कार्यक्रम पार्टी सभापति नारायणप्रसाद गौडेलको सभापतित्वमा सम्पन्न भएको थियो ।

प्रकाशित मिति: शनिबार, साउन १४, २०७९ १९:०९