प्रतिनिधिसभा सदस्य उम्मेदवारका रुपमा बाँकेमा जसको छ चर्चा...

राजनीति

गृहपृष्ठ
राजनीति
प्रतिनिधिसभा सदस्य उम्मेदवारका रुपमा बाँकेमा जसको छ चर्चा...

प्रतिनिधिसभा सदस्य उम्मेदवारका रुपमा बाँकेमा जसको छ चर्चा...

मंगलबार, साउन २४, २०७९ बागेश्वरी पोस्ट

नेपालगञ्ज । बाँकेमा चुनावी चासो बढेको छ । संघीय र प्रदेश निर्वाचनको मिति घोषणा भएपछि चुनावी चासो बढेको हो । मंसिर ४ गते एकै चरणमा प्रतिनिधिसभा र प्रदेशसभाको चुनाव हुने भएपछि उम्मेदवारहरुको चर्चा शुरु भएको छ । मुख्य राजनीतिक दलहरुले क-कसलाई उम्मेदवार बनाउँछन् भन्ने चासो बढेको हो ।

सत्तारुढ दलहरुबीच चुनावी तालमेल हुने पक्का भएपछि बाँकेमा पनि गठबन्धनकारी दलहरुको मुख्य प्रतिष्पर्धा नेकपा एमाले र राप्रपासंग हुने देखिएको छ । क्षेत्र नम्बर १ र ३ मा गठबन्धन र एमाले तथा क्षेत्र नम्बर २ मा गठबन्धनको प्रतिष्पर्धा एमाले र राप्रपासंग हुने आंकलन गरिएको छ । यसअघि भएका विभिन्न चुनावहरु र भर्खरै सम्पन्न स्थानीय चुनावको नतिजा विश्लेषण गर्दा मुख्य प्रतिष्पर्धा एमालेसंग हुनेछ।

क्षेत्र नम्बर १ मा नेपाली कांग्रेसका नारायणप्रसाद गौडेल, पोषण केसी, माधवराम खत्री लगायतको चर्चा छ । गौडेल पार्टी सभापति हुन् । केसी क्षेत्रीय सभापति र खत्री पूर्व क्षेत्रीय सभापति हुन् । यी बाहेक पूर्व सांसद ज्ञानु केसी, तरुण दलका पूर्व महासचिव हुर्मतकुमार न्यौपाने पनि सम्भावित अनुहार हुन् । यो क्षेत्रमा गत चुनावमा नेकपा माओवादी केन्द्रले जित हासिल गरेकाले गठबन्धन दलहरु बीचको सिट बाँडफाँडमा क्षेत्र नम्बर १ माओवादीकै भागमा पर्ने सम्भावना अधिक छ । त्यो हुँदा माओवादीबाट युवा तथा खेलकुद मन्त्री समेत रहेका हालका सांसद महेश्वरजंग गहतराज 'अथक' र प्रदेश सांसद कृष्णा केसी 'नमुना'को सम्भावना रहनेछ । एमालेबाट भने केन्द्रीय सदस्य एवम् बाँके जिल्ला इन्चार्ज सूर्य ढकाल र २०७० का संविधानसभा सदस्य देवराज भारको सम्भावना देखिएको छ ।

क्षेत्र नम्बर २ मा जनता समाजवादी पार्टीका नेता एवम् भौतिक पूर्वाधार मन्त्री मो. इश्तियाक राईको उम्मेदवारी पनि लगभग निश्चित जस्तै छ। यसअघि उनले यस क्षेत्रबाट जितेकाले गठबन्धनको भागमा परेपछि उनी नै उम्मेदवार हुनेछन् । कांग्रेस बृत्तमा भने पूर्व पार्टी सभापति एवम् पूर्व प्रधानमन्त्री स्वर्गीय सुशील कोइरालाको विरासत जोडिएको क्षेत्र नम्बर २ गठबन्धनका नाममा छोड्न हुँदैन भन्ने मत बलियो छ । तर, गठबन्धन संस्कृतिमा गइसकेपछि केन्द्रले गरेको निर्णय मान्न बाध्य हुने अवस्था छ ।

क्षेत्र नम्बर २ मा कांग्रेसबाट निवर्तमान सभापति किरण कोइराला, पूर्व पार्टी सभापति एवम् पूर्व मन्त्री गजेन्द्र हमाल, लुम्बिनी प्रदेशका वन वातावरण तथा भूसंरक्षण मन्त्री सुरेन्द्र हमाल, क्षेत्रीय सभापति रमेश गुप्ता, महासमिति सदस्य निरन्जनसिंह सिजापति, राजकुमार बर्मा, तरुण दल अध्यक्ष बिरेन्द्र शाह, डा. सुरेश कुमार कनोडिया, निवर्तमान जिल्ला उपसभापति सुनिलनरसिंह राणा लगायतको चर्चा छ । २०७४ मा पनि कांग्रेसले राप्रपाका ओमप्रकाश आजादलाई सघाउँदा कांग्रेसको उम्मेदवारी यो क्षेत्रमा परेको थिएन । बाँकेका अन्य क्षेत्र भन्दा तुलनात्मक रुपमा बलियो मानिएको राप्रपाबाट महामन्त्री डा.धवल शमशेर राणा उम्मेदवार बन्ने पक्कापक्की जस्तै छ । उनलाई बलियो उम्मेदवारका रुपमा हेरिएको छ । एमालेबाट केन्द्रीय सदस्य एवम् बाँके जिल्ला सहइन्चार्ज मो. हारुन र उद्योगी व्यवसायी नेता कृष्णप्रसाद श्रेष्ठको सम्भावना रहेको बताइन्छ ।

क्षेत्र नम्बर ३ मा भने गठबन्धनबाट नेपाली कांग्रेसले उम्मेदवारी पाउने प्रबल सम्भावना देखिन्छ । यसअघि एमालेले जितेको क्षेत्र भएकाले बाँकेमा अन्य क्षेत्र अरु दललाई दिने अवस्थामा क्षेत्र नम्बर ३ कांग्रेसकै भागमा पर्ने देखिन्छ । २०७४ को निर्वाचनमा एमालेका नन्दलाल रोकायले नेपाली कांग्रेसका नेता बादशाह कुर्मीलाई हराएर सांसद बनेका थिए । यसपटक कांग्रेसबाट संविधानसभा सदस्य समेत रहेका कुर्मीसंगै यसअघि प्रदेशमा उम्मेदवार बनेका महासमिति सदस्य लक्ष्मीनारायण शाह र अर्का महासमिति सदस्य मेघराज ओलीले पनि दाबेदारी प्रस्तुत गरेका छन् । एमालेबाट जिल्ला अध्यक्ष किष्मतकुमार कक्षपति, सचिव रत्न खत्री, नेता भिम वली लगायतले दाबी गरेका छन् । माओवादीबाट हालका प्रदेश सांसद आइपी खरेल, नेकपा एकीकृत समाजवादीका नेता पूर्व मन्त्री दलबहादुर सुनार पनि आकांक्षी हुन् ।

२०७४ को समीकरण उल्टिँदा दबाबमा परेको एमाले यहाँ रक्षात्मक अवस्थामा देखिन्छ । पाँच दलीय गठबन्धनको चुनावी तालमेलले एमालेलाई राप्रपासंग नजिक हुने अवस्था सिर्जना गरिदिएको छ । क्षेत्र नम्बर २ मा राप्रपाका महामन्त्री डा.राणालाई सघाएर क्षेत्र नम्बर १ र २ मा राप्रपाको साथ एमालेले खोज्ने सम्भावना पनि उत्तिकै देखिएको छ । स्थानीय तहको चुनावमा वडा अध्यक्षहरुले पाएको मतलाई हेर्दा तीन वटै निर्वाचन क्षेत्रमा कांग्रेस अगाडि छ । सबै क्षेत्रमा ३ हजार हाराहारीमा कांग्रेस अगाडि छ । सत्तारुढ दलहरुको चुनावी तालमेलले यी दलका उम्मेदवारहरुको जितलाई अझ सहज बनाउने विश्लेषण भइरहेको छ । कांग्रेस बृत्तमा पनि सबैभन्दा बलियो क्षेत्र १ नम्बर भएकाले ३ नम्बर माओवादीलाई छाडेर १ नम्बर क्षेत्र लिनुपर्ने भन्दै नेताहरुले केन्द्रमा दबाब बढाएको बुझिएको छ । तर, यो सम्भावना ज्यादै न्यून रहेको बताइन्छ ।

बाँकेको क्षेत्र नम्बर १ मा कोहलपुर नगरपालिका, राप्तीसोनारी गाउँपालिका र नरैनापुर गाउँपालिका पर्दछन् । क्षेत्र नम्बर २ मा १६ र १७ नम्बर वडा बाहेक नेपालगञ्ज उपमहानगरपालिका र डुडुवा गाउँपालिका तथा क्षेत्र नम्बर ३ मा नेपालगञ्जका १६ र १७ नम्बर वडा तथा खजुरा, जानकी र बैजनाथ गाउँपालिका पर्दछन् ।

हुर्नुस् वडा अध्यक्षहरुले पाएको मत अनुसार दलगत विवरण

क्षेत्र नम्बर १

नेपाली कांग्रेस २८६१९

नेकपा एमाले २५३१०

माओवादी केन्द्र १७११०

राप्रपा ४७८९

जसपा ३९५१

नेकपा एस ६२३

लोसपा ३६१

क्षेत्र नम्बर २

नेपाली कांग्रेस १८०३७

नेकपा एमाले १५४७८