'जनताको साथमा कांग्रेस' अभियानका लागि बाँकेका ८ वटै पालिकामा खटिए प्रतिनिधि

राजनीति

गृहपृष्ठ
राजनीति
'जनताको साथमा कांग्रेस' अभियानका लागि बाँकेका ८ वटै पालिकामा खटिए प्रतिनिधि

'जनताको साथमा कांग्रेस' अभियानका लागि बाँकेका ८ वटै पालिकामा खटिए प्रतिनिधि

सोमबार, भदौ १३, २०७९ बागेश्वरी पोस्ट

नेपालगञ्ज । नेपाली कांग्रेस बाँकेले 'जनताको साथमा कांग्रेस' अभियानका लागि जिल्लाका आठ वटै पालिकामा जिल्ला प्रतिनिधि खटाएको छ । केन्द्रले सञ्चालन गरेको अभियानलाई सफल बनाउन जिल्ला स्तरबाट पनि पालिकामा एक/एक जना प्रतिनिधि खटाइएको हो ।

नेपाली कांग्रेस बाँकेका सभापति नारायणप्रसाद गौडेलले आठ वटा पालिकामा प्रतिनिधि खटाइएको बताए । गौडेलका अनुसार जिल्ला प्रतिनिधिका रुपमा पार्टी पदाधिकारीहरुलाई नै खटाइएको छ । जिल्ला कार्यसमितिका उपसभापति गोपालप्रसाद अधिकारीलाई डुडुवा गाउँपालिका, अर्का उपसभापति कृष्णबहादुर कार्कीलाई कोहलपुर नगरपालिका तथा सचिवद्वय सुधांशु कोइरालालाई नेपालगञ्ज उपमहानगरपालिका र सञ्जु कुमारी चौधरीलाई नरैनापुर गाउँपालिकामा खटाइएको छ । यस्तै कोषाध्यक्ष यज्ञबहादुर बस्नेतलाई बैजनाथ गाउँपालिका, सहसचिवद्वय रेणुसिंह ठाकुरलाई जानकी र विनोदकुमार थारुलाई खजुरा गाउँपालिकामा जिल्ला प्रतिनिधिका रुपमा खटाइएको छ । पार्टी प्रबक्ता डिल्ली गिरीलाई राप्तीसोनारी गाउँपालिकाको प्रतिनिधिका रुपमा खटाइएको सभापति गौडेलले बताए ।

पालिकामा खटिएका जिल्ला प्रतिनिधिहरुले केन्द्रीय प्रतिनिधि र प्रदेश प्रतिनिधिसंग समन्वय गर्नेछन् । अभियान अवधिभर सम्बन्धित पालिकामा क्रियाशील रही विभिन्न वडा र टोलका कार्यक्रममा सहभागी हुने गौडेलले बताए । यस्तै 'जनताको साथमा कांग्रेस' अभियानलाई सफल बनाउन भदौ २०, २१ र २२ गते तीन वटै संघीय निर्वाचन क्षेत्रमा कार्यक्रम गरिने जनाइएको छ । २० गते क्षेत्र नम्बर १, २१ गते क्षेत्र नम्बर २ र २२ गते क्षेत्र नम्बर ३ मा कार्यक्रमको आयोजना गरिएको प्रबक्ता गिरीले बताएका छन् । अभियानको समापन भदौ २४ गते गरिनेछ ।

प्रकाशित मिति: सोमबार, भदौ १३, २०७९ ११:०४

प्रतिक्रिया दिनुहोस्