जसपा गठबन्धनबाट बाहिरिने संकेत, अरु दलको साथ खोज्दै जसपा

राजनीति

गृहपृष्ठ
राजनीति
जसपा गठबन्धनबाट बाहिरिने संकेत, अरु दलको साथ खोज्दै जसपा

जसपा गठबन्धनबाट बाहिरिने संकेत, अरु दलको साथ खोज्दै जसपा

शनिबार, असोज १५, २०७९ बागेश्वरी पोस्ट

नेपालगन्ज । जनता समाजवादी पार्टी (जसपा) ले गठबन्धनबाट बाहिरिने संकेत गरेको छ । सिट बाँडफाँटमा सन्तोषजनक अवस्था नदेखेपछि गठबन्धनबाट बाहिरिने संकेत जसपाले गरेको जनाइएको छ ।

आज बसेको जसपा कार्यकारिणी समितिको बैठकले आगामी निर्वाचनमा सत्ता गठबन्धन बाहेकका दलसँग समेत तालमेलका लागि विकल्प खुला राख्ने निर्णय गरेको छ ।

‘‘संघीय संसद र प्रदेससभा सदस्यको निर्वाचनमा सिटको तालमेलका लागि भइरहेको सिट बाँडफाँटसम्बन्धि छलफलमा हाम्रो पार्टीका लागि सन्तोषजनक अवस्था नदेखिएको हुँदा यसका अतिरिक्त सम्भव भएसम्म विकल्पको रूपमा अन्य राजनीतिक दलहरूसँग पनि निर्वाचनमा सिटको तालमेल गर्न सकिनेछ,’ बैठकपछि जसपा प्रवक्ता मनिष सुमनले जारी गरेको विज्ञप्तिमा भनिएको छ ।

अन्य दलसँग पनि तालमेल नभएको अवस्थामा निर्वाचनमा एक्लै भाग लिने निर्णय गरेको सुमनले बताएका छन् । प्रवक्ता सुमनले सत्ता गठबन्धनभित्रै सिटको बाँडफाँटमा सहमति जुटाउने आफूहरूको पहिलो प्राथमिकता रहेको भने ।

‘गठबन्धनभित्रै सिटको बाँडफाँट टुंग्याउने हाम्रो पहिलो प्राथमिकता हो,’ उनले भने, ‘सहमति जुट्न नसकेको खण्डमा अन्य दलसँग तालमेलका लागि प्रयास हुन्छ । त्यो पनि सम्भव नभए चुनावमा एक्लै जानेछौं ।’

सत्ता गठबन्धनभित्र मधेस प्रदेशको सिट बाँडफाँटका लागि रस्साकस्सी चलिरहेको छ । मधेस प्रदेसका कतिपय जिल्लामा एउटै सिटका लागि गठबन्धनका घटक दलहरूको दोहोरो तेहरो दाबी परेको छ ।

धनुषाको निर्वाचन क्षेत्र नम्बर २, ३ र ४ कांग्रेसले नछाड्ने अडान राखेको छ भने त्यसमा जसपाको पनि दाबी छ ।

त्यस्तै धनुषाको क्षेत्र नम्बर २ मै नेकपा (एकीकृत समाजवादी) ले पनि दाबी गरिरहेको छ ।धनुषाजस्तै मधेस प्रदेसका अरू जिल्लाहरूमा पनि एउटै सिटमा सत्ता घटकका एकभन्दा बढी दलको दाबी छ ।

प्रकाशित मिति: शनिबार, असोज १५, २०७९ १८:०९