चुनाव नलड्ने बाबुराम भट्टराईको घोषणा

राजनीति

गृहपृष्ठ
राजनीति
चुनाव नलड्ने बाबुराम भट्टराईको घोषणा

चुनाव नलड्ने बाबुराम भट्टराईको घोषणा

सोमबार, असोज १७, २०७९ बागेश्वरी पोस्ट

नेपालगन्ज । नेपाल समाजवादी पार्टीका अध्यक्ष बाबुराम भट्टराईले आगामी प्रतिनिधिसभाको चुनाव नलड्ने घोषणा गरेका छन् ।

सोमबार सामाजिक सञ्जालमा गोरखाका आफ्ना मतदाताहरूलाई सम्बोधन गर्दै उनले यस्तो घोषणा गरेका हुन् ।

‘२०६४, २०७० र २०७४ को संविधानसभा र प्रतिनिधिसभा निर्वाचनमा अत्यधिक मतले विजयी गराएर तपाईंहरूको सेवा गर्ने अवसर दिनुभएकोमा सम्पूर्ण गोरखाली बुबाआमा, दिदीबहिनी, दाज्यूभाइहरूमा अन्तः हृदयदेखि आभार ब्यक्त गर्दछु’ उनले भनेका छन्, ‘आगामी २०७९ मंसीर ४ को प्रतिनिधसभा निर्वाचनमा म उम्मेदवार नबन्ने यहाँहरू सबैलाई विनम्र जानकारी गराउन चाहन्छु ।’ उनले चुनाव नलडे पनि आफ्नो क्षेत्रमा बाँकी रहेका विकास निर्माणका काममा निरन्तर लागिपर्ने प्रतिवद्धता पनि व्यक्त गरेका छन् ।

‘मेरो कार्यकालमा गोरखाको दूरगामी विकास र समृद्धिका लागि आधारभूत भौतिक तथा सामाजिक पूर्वाधारहरू बनेका छन् भने केही शुरूभएका आयोजना पूरा हुन बाँकी छन् । बाँकी रहेका आयोजना पूरा गर्न र ती पूर्वाधारको जगमा अब उत्पादन र रोजगारमुखी योजना र कार्यक्रम ल्याएर ऐतिहासिक गोरखालाई देशकै नमूना विकासको केन्द्र बनाउन म संसदमा नरहे पनि निरन्तर सक्रिय योगदान गरिरहनेछु’ उनले लेखेका छन् ‘२०६५ देखि अहिलेसम्म प्रत्येक महिना गोरखा आउने जाने र जनताको घरदैलोमा पुग्ने काम गरिराखें र तपाईंहरूबाट धेरै सिक्ने अवसर पाएँ । आगामी दिनमा पनि म निरन्तर तपाईंहरूकै सेवामा रहिरहनेछु ।’ चुनाव नलडे पनि आफू राजनीतिक क्षेत्रबाट अलग नभएको प्रष्टिकरण दिँदै उनले पार्टी र जनसेवामा निरन्तर लागिरहने पनि बताएका छन् ।

‘चुनाव नलड्नु भनेको राजनीति छोड्नु हैन ! कतिपय मानिसहरूले जानेर नजानेर त्यस्तो सोच्न/भन्न सक्छन् । सत्तादेखि सत्ता र चुनावदेखि चुनावसम्मको राजनीति गर्नेहरूले त्यसो भन्नु अन्यथा हैन । तर सही र असल राजनीति भनेको समाजको सर्वतोमुखी अग्रगामी रूपान्तरण र जनता/समाजको सेवा गर्ने साधन हो । म त्यसमा विश्वास गर्छु र आजीवन त्यही मार्गमा लागिरहनेछु । पार्टीको काम र जनसेवामा म निरन्तर खटिरहनेछु’ उनले भनेका छन् ‘म सबै गोरखाली दिदीबहिनी दाज्युभाइहरूलाई विश्वास दिलाउन चाहन्छु मेरो ठाउँमा तपाईंहरूले अझै सक्षम र जिम्मेवार व्यक्तिको नेतृत्व पाउनुहुनेछ र गोरखाको विकासको गतिले अझै तीब्रता पाउनेछ । म त्यहॅा साथमा हुनेछु ।’

प्रकाशित मिति: सोमबार, असोज १७, २०७९ १२:४९