कोहलपुरको नगरसभा ८ गतेः शिक्षा र डिजिटल कोहलपुर प्राथमिकतामा

स्थानीय

गृहपृष्ठ
स्थानीय
कोहलपुरको नगरसभा ८ गतेः शिक्षा र डिजिटल कोहलपुर प्राथमिकतामा

कोहलपुरको नगरसभा ८ गतेः शिक्षा र डिजिटल कोहलपुर प्राथमिकतामा

आइतबार, असार ५, २०७९ बागेश्वरी पोस्ट

कोहलपुर । बाँकेको कोहलपुर नगरपालिकाको नगर सभा यही असार ८ गतेका लागि तय भएको छ । बस्तीस्तरबाट योजना छनोट गरी विभिन्न समितिमा छलफल गरेर नीति, कार्यक्रम तथा बजेटलाई अन्तिम रुप दिने तयारीमा नगरपालिका रहेको नगरप्रमुख पूर्णप्रसाद आचार्यले जानकारी दिए ।

उनले असार ८ गते दिउँसो १ बजे हुने नगरसभामा नीति, कार्यक्रम तथा बजेट पेश गरिने जानकारी दिए । यो पटक कोहलपुर नगरपालिकाले शिक्षा र डिजिटल कोहलपुरलाई प्राथमिकतामा राखेको छ । ‘भौतिक पूर्वाधार विकासले मात्र विकसित र सम्बृद्ध कोहलपुर नहुँदो रहेछ,' नगरप्रमुख आचार्यले भने–‘त्यसका लागि शिक्षा र प्रविधिलाई अगाडि बढाउन जरुरी देखियो ।’ आर्थिक वर्ष ०७९/८० का लागि विनियोजित बजेटमा शिक्षाको मात्र कम्तिमा ११ प्रतिशत बजेट हुने जानकारी दिए ।

स्वास्थ्यलाई समेत प्राथमिकतामा राखिएको जानकारी दिँदै उनले आगामी बजेटमा बाख्रा बाँड्ने कार्यक्रमलाई भने हटाइएको स्पष्ट पारे । ‘कृषकलाई प्रोत्साहन गर्ने सवालमा हामी गम्भीर छौं, उनले भने–‘किसानलाई प्राविधिक सहयोग गर्न सकिन्छ तर बाख्रा बाँड्न सकिँदैन, त्यो कार्यक्रम हटाइएको छ ।’ बाख्रा वितरण कार्यक्रम उपलब्धिमूलक र उपयोगी नभएको यथार्थता प्रस्तुत गर्दै उनले भने–‘यसअघि बाख्रा बाँडेको संख्या हेर्ने हो भने कोहलपुरका प्रत्येक घरमा बाख्रा हुनुपर्ने हो तर त्यो देखिएन ।’

उनले सम्बृद्ध र विकसित कोहलपुर नगरपालिका बनाउने अभियानमा रहेकाले सबैको सहयोग र साथको आवश्यकता औंल्याए । नगर प्रमुखमा निर्वाचित भएपछि पहिलो पटक पत्रकारहरुसँग अन्तरक्रिया गरेका आचार्यले कोहलपुर नगरपालिकालाई मिडियामैत्री नगर बनाउने प्रतिबद्धता समेत जनाएका छन् ।

प्रकाशित मिति: आइतबार, असार ५, २०७९, १६:३४:००

प्रतिक्रिया दिनुहोस्