मुख्यमन्त्री चौधरीद्वारा नेपालगञ्जस्थित प्रदेश प्रहरी अस्पतालको निरीक्षण

स्वास्थ्य

गृहपृष्ठ
स्वास्थ्य
मुख्यमन्त्री चौधरीद्वारा नेपालगञ्जस्थित प्रदेश प्रहरी अस्पतालको निरीक्षण

मुख्यमन्त्री चौधरीद्वारा नेपालगञ्जस्थित प्रदेश प्रहरी अस्पतालको निरीक्षण

अस्पतालको स्तरोन्नति गर्ने प्रतिबद्धता, ५० शय्याको स्वीकृति प्रदान गरिने

बुधबार, मंसिर २०, २०८० बागेश्वरी पोस्ट

नेपालगञ्ज । लुम्बिनी प्रदेशका मुख्यमन्त्री डिल्लीबहादुर चौधरीले आज नेपालगञ्जस्थित लुम्बिनी प्रदेश प्रहरी अस्पतालको निरीक्षण गरेका छन् । अस्पताल निरीक्षण गर्दै उनले प्रदेशभित्रका अस्पताल र स्वास्थ्य संस्थाहरुको स्तरोन्नति र आधुनिकीकरण सरकारको प्राथमिकतामा रहेको बताएका छन् । चौधरीले प्रदेश प्रहरी अस्पतालको पनि स्तरोन्नति गरिने बताए ।

उनले बिरामीको चाप र सेवा हेर्दा प्रहरी अस्पताललाई ५० शय्याको बनाउन आवश्यक देखिएको बताउँदै प्रक्रिया पूरा गरेर ५० शय्याको स्वीकृति प्रदान गरिने जानकारी दिए । १५ शय्याको उक्त अस्पताल अहिलेका लागि निकै सानो र कम क्षमताको रहेकोले अस्पताललाई आवश्यक पर्ने पूर्वाधारसँगै जनशक्ति र उपकरण थप गरेर अस्पतालको स्तरोन्नति गरिने मुख्यमन्त्री चौधरीले बताए । उनले नेपालगञ्ज स्वास्थ्य उपचारको हब बन्दै गएकाले सरकारले सरकारी स्वास्थ्य संस्थाहरुलाई आधुनिक प्रविधि र प्राविधिकको अभाव हुन नदिने गरी काम गरिरहेको बताए ।

लुम्बिनी प्रदेश प्रहरी अस्पतालका प्रमुख तथा प्रहरी वरिष्ठ उपरीक्षक डा. अमिनकुमार श्रेष्ठले अस्पतालको गतिविधि र समस्याहरुका बारेमा जानकारी गराउँदै पूर्वाधार र जनशक्तिको अभावले समस्या रहेको बताए । उनले लुम्बिनी मात्र नभई कर्णाली र सुदूरपश्चिमका प्रहरी, प्रहरी परिवार र पूर्व प्रहरी तथा उनका परिवारका बिरामीलाई सेवा दिँदै आएको यो अस्पताललाई तत्काल ५० शय्याको बनाउनुपर्ने माग गरे ।

अस्पताल प्रमुख डा. श्रेष्ठले ४२ बेडको अस्पतालको नयाँ भवन निर्माणाधीन रहेकोले भवनको निर्माण पूरा हुने बित्तिकै ५० शय्याको अनुमतिका लागि मुख्यमन्त्रीको ध्यानाकर्षण गराए ।

प्रकाशित मिति: बुधबार, मंसिर २०, २०८० २०:१९

प्रतिक्रिया दिनुहोस्