एनआरएनको निर्वाचन केहीबेरमा, ८ बजेसम्म जारी रहने

राजनीति

गृहपृष्ठ
राजनीति
एनआरएनको निर्वाचन केहीबेरमा, ८ बजेसम्म जारी रहने

एनआरएनको निर्वाचन केहीबेरमा, ८ बजेसम्म जारी रहने

बुधबार, असोज २९, २०७६ बागेश्वरी पोस्ट

काठमाडौं । गैरआवासीय नेपाल संघ (एनआरएनए)को निर्वाचन केही समयमा सुरु हुने भएको छ । एनआरएनएको नवौं विश्व सम्मेलन तथा अन्तर्राष्ट्रिय महाधिवेशनले संघको नयाँ नेतृत्व चयन गर्न लागेको हो ।

उम्मेदवारी घोषणा भएअनुसार वर्तमान उपाध्यक्षद्वय कुमार पन्त र कुल आचार्य अध्यक्ष पदका लागि प्रतिस्पधाृ गर्दैछन् । यही अपरान्ह सुरु हुने निर्वाचन राति ८ बजेसम्म हुनेछ । त्यसको एक घन्टापछि संघने नयाँ नेतृत्व पाउनेछ । संघको निर्वाचनमा यसअघि जस्तै विद्युतीय मतदान हुनेछ ।

एनआरएनको नयाँ नेतृत्वका लागि विभिन्न १४ पदका लागि ४२ जना चुनिने छन् । संघको अध्यक्षमा एकजना, उपाध्यक्षमा ५ जना (एक महिलासहित), महासचिवमा १ जना, सचिवमा २ जना, कोषाध्यक्ष, सहकोषाध्यक्ष, महिला संयोजक र युवा संयोजकमा १–१ जना निर्वाचित हुनेछन् ।

प्रत्येक क्षेत्रीय समितिबाट एक–एकजना गरी ६ जना क्षेत्रीय संयोजकहरु विश्व सम्मेलनबाट निर्वाचित हुनेछन् । त्यसैगरी क्षेत्रीय उपसंयोजक अन्तर्गत यसपटक युरोप क्षेत्रबाट ३ जना निर्वाचित हुने छन् । विधानबमोजिम युरोपमा ३ जना क्षेत्रीय उपसंयोजक हुने निर्वाचन समितिको सूचनामा उल्लेख छ ।

त्यस्तै एसिया प्रशान्त, अफ्रिका र मध्यपूर्वबाट २–२ जना क्षेत्रीय उपसंयोजक छानिने छन् भने उत्तर–दक्षिण अमेरिका र ओसेनियाबाट १–१ जना क्षेत्रीय उपसंयोजकमा निर्वा्चित हुन पाउने छन् । प्रत्येक क्षेत्रबाट १–१ जनाका दरले ६–६ जना क्षेत्रीय महिला संयोजक र क्षेत्रीय युवा संयोजक चुनिने संघले जनाएको छ ।
आचार्य र पन्तले नेतृत्व गरेका दुई टीमबीच कडा प्रतिस्पर्धा देखिएको छ ।

प्रकाशित मिति: बुधबार, असोज २९, २०७६ १६:५३