दार्चुलामा हिमपहिरोमा बेपत्ता ५ जनामध्ये ३ शव फेला पर्यो

समाचार

गृहपृष्ठ
समाचार
दार्चुलामा हिमपहिरोमा बेपत्ता ५ जनामध्ये ३ शव फेला पर्यो

दार्चुलामा हिमपहिरोमा बेपत्ता ५ जनामध्ये ३ शव फेला पर्यो

बुधबार, वैशाख २०, २०८० बागेश्वरी पोस्ट

नेपालगन्ज । दार्चुलामा हिमपहिरोमा बेपत्ता भएका पाँच जना मध्ये तीन जनाको शव सशस्त्र प्रहरीले फेला पारेको छ ।

दार्चुलाको व्यास गाउँपालिका–१ हिमपहिरोमा परी सम्पर्क विहीन रहेका पाँच जनामध्ये दुई महिला र एक पुरुषको शव फेला पारेको हो ।

दार्चुलाको छाङरुमा रहेको सशस्त्र प्रहरी बल ५० नम्बर गुल्मका गुल्मपति सशस्त्र प्रहरी नायब उपरीक्षक ईश्वरीदत्त भट्टले केही बेर अघि बेपत्ता भएको ठाउँबाट करिब अढाइ किलोमिटर तल हिउँभन्दा बाहिर मृतावस्थामा तीन शव भेटिएको जानकारी दिए ।

“शव भेटिएपछि स्थानीय, नेपाल प्रहरी र हाम्रो टोली घटनास्थल पुगिसकेको छ ।” उनले भने-“शव भेटिए पनि पहिचान भने खुलिसकेको छैन ।”

मङ्गलबारदेखि हिमपहिरोमा परी सम्पर्कविहीन रहेका यार्सा सङ्कलक मध्ये सात जनाको सशस्त्र प्रहरीले उद्धार गरेको थियो भने पाँच जना सम्पर्कविहीन थिए ।

दिउँसोबाट सशस्त्रको टोली उद्धार तथा खोजीमा खटिएको भए पनि लगातारको हिमपात र वर्षाका कारण कठिनाई भइरहेको थियो ।

प्रकाशित मिति: बुधबार, वैशाख २०, २०८० १३:३०

प्रतिक्रिया दिनुहोस्