जाजरकोट भूकम्पका ३८ जना घाइतेको बाँकेमा उपचार जारी, सबै खतरामुक्त

समाचार

गृहपृष्ठ
समाचार
जाजरकोट भूकम्पका ३८ जना घाइतेको बाँकेमा उपचार जारी, सबै खतरामुक्त

जाजरकोट भूकम्पका ३८ जना घाइतेको बाँकेमा उपचार जारी, सबै खतरामुक्त

आइतबार, कात्तिक १९, २०८० गौरब गिरी

नेपालगञ्ज । गत शुक्रबार मध्ये रातमा जाजरकोट केन्द्रविन्दु बनाएर गएको भूकम्पबाट घाइते भएका मध्ये ३८ जनाको बाँकेको नेपालगञ्ज र कोहलपुरमा उपचार जारी छ।

घाइतेहरु मध्ये भेरी अस्पतालमा ३७ जना र नेपालगञ्ज मेडिकल कलेज कोहलपुरमा १ जनाको उपचार भइरहेको जिल्ला आपतकालीन कार्य सञ्चालन केन्द्र बाँकेका फोकल पर्सन नरेश श्रेष्ठले जानकारी दिए । उपचार गराइरहेका मध्ये २१ जना महिला र १७ जना पुरुष रहेका छन् । यी मध्ये बालबालिका १२, गर्भवती १ जना र ज्येष्ठ नागरिक ५ जना छन् । जाजरकोटका २८ र रुकुम पश्चिममा १० जनाको उपचार भइरहेको छ ।

श्रेष्ठका अनुसार गएराति १२ बजेसम्म ५ जना गम्भीर घाइतेको सफल अपरेशन गरिएको छ भने राति करिब १ बजे थप ६ जना बिरामी एम्बुलेन्सबाट उपचारका लागि भेरी अस्पतालमा ल्याइएको छ । जसमध्ये २ जना जाजरकोटको भेरी नगरपालिका र ४ जना रुकुम पश्चिमको सानी भेरी गाउँपालिकाका हुन् ।

फोकल पर्सन श्रेष्ठका अनुसार हाल उपचाररत सबै घाइतेको अवस्था सुधारोन्मुख र खतरामुक्त रहेको छ। त्यस्तै अस्पताल पुर्‍याउनु पूर्व बाटोमै मृत्यु भएका जाजरकोटको नलगाड–१ का टेकबहादुर पुनको शव आफन्तलाई बुझाइएको छ। घाइते मध्ये एक जना गर्भवती पनि छन् । उनको पेट भित्रको बच्चाको मृत्यु भएकाले शल्यक्रिया गर्ने तयारी गरिएको श्रेष्ठले जानकारी दिए ।

प्रकाशित मिति: आइतबार, कात्तिक १९, २०८० ०९:१८