नेपालगन्जका सहकारीलाई दिइयो तीन दिने 'कोपोमिस' तालिम

अर्थ

गृहपृष्ठ
अर्थ
नेपालगन्जका सहकारीलाई दिइयो तीन दिने 'कोपोमिस' तालिम

नेपालगन्जका सहकारीलाई दिइयो तीन दिने 'कोपोमिस' तालिम

मंगलबार, फागुन १५, २०८० बागेश्वरी पोस्ट

नेपालगन्ज । नेपालगन्ज उपमहानगरपालिकाका सहकारीलाई सहकारी तथा गरिवी निवारण व्यवस्थापन सूचना प्रणाली (कोपोमिस) सम्बन्धि तीन दिने तालिम दिइएको छ । नेपालगन्ज उपमहानगरपालिकाको नियमन क्षेत्रभित्र रहेका सहकारी संस्थाका कोपोमिस हेर्ने कर्मचारीका लागि तीन दिने कार्यशाला गोष्ठी सम्पन्न गरिएको सहकारी शाखाले जनाएको छ ।

तीन दिने तालिमको समापन गर्दै नेपालगन्ज उपमहानगरपालिकाका आर्थिक विकास संयोजक गोपाल पुनले सिकेका कुरालाई व्यवहारमा अक्षरश: लागू गर्न आग्रह गरे । पुनले सहकारी अभियानलाई स्वस्थ, विश्वसनीय र उत्तरदायी बनाउन नेपालगन्ज उपमहानगरपालिका निरन्तर क्रियाशील रहेको बताए । उनले सहकारीले पनि आमनागरिकको विश्वास जित्ने गरी काम गर्न आवश्यक रहेकोमा जोड दिए । प्रशिक्षार्थीलाई पुनले प्रमाणपत्र वितरण गरेका थिए । समापन कार्यक्रममा प्रशिक्षकका तर्फबाट नेप्स्कुन बाँकेका कार्यालय प्रमुख छत्रप्रसाद धमाला तथा प्रशिक्षार्थीबाट रुपक श्रेष्ठ र चन्द्रा आचार्यले बोलेका थिए ।

कोपोमिस एउटा सफ्टवेयर हो । यो सहकारी क्षेत्रको सूचना, तथ्यांकहरुलाई नियमित, विश्वसनीय, वास्तविक बनाई व्यवस्थापन सूचना प्रणालीमा आधारित अनुगमन, नियमन पद्धति स्थापित गर्न तयार गरिएको आधुनिक सूचना प्रणाली हो । यसले सहकारी संघ-संस्थाहरूको संचालन, ब्यवस्थापन तथा कार्यक्षमतामा अभिवृद्धि गरी जोखिमलाई न्युनीकरण गर्ने कामहरु गर्दछ । सहकारीहरुले मासिकरुपमा आफ्ना सम्पूर्ण विवरण, कार्यप्रगति लगायतका गतिविधि कोपोमिसमा अद्यावधिक गर्नुपर्दछ । जसले नियामक निकायलाई आवश्यक अनुगमन र नियन्त्रणका लागि सहयोग पुग्दछ ।

तालिममा सहकारी शाखा प्रमुख प्रविण राना, जिल्ला सहकारी संघ बाँकेका प्रबन्ध सञ्चालक नवराज उपाध्याय र नेप्स्कुन बाँकेका कार्यालय प्रमुख धमालाले प्रशिक्षण दिएको सहकारी शाखाकी तुलसा पन्थी आचार्यले बताइन् । सहकारी संघ-संस्थाहरुका सञ्चालक र व्यवस्थापनका अधिकारीहरुका लागि कोपोमिस तालिम अत्यन्तै महत्वपूर्ण मानिन्छ ।

नेपालगन्ज उपमहानगरपालिकाले नगरभित्रका सहकारी संस्थाको नियमन, प्रवर्द्धन र प्रशिक्षणका कार्यक्रम आफ्नो वार्षिक तालिका अनुसार नियमितरुपमा गर्दै आएको शाखा प्रमुख रानाले बताए ।

प्रकाशित मिति: मंगलबार, फागुन १५, २०८० १९:०३