सातौं प्रादेशिक महोत्सव सुरु, भोलि ज्योती मगरको प्रस्तुति

अर्थ

गृहपृष्ठ
अर्थ
सातौं प्रादेशिक महोत्सव सुरु, भोलि ज्योती मगरको प्रस्तुति

सातौं प्रादेशिक महोत्सव सुरु, भोलि ज्योती मगरको प्रस्तुति

मंगलबार, चैत ६, २०८० बागेश्वरी पोस्ट

नेपालगञ्ज । सातौं प्रादेशिक औद्योगिक लघु, घरेलु तथा कृषि, व्यापार एवम् पर्यटन महोत्सवको आज एक समारोहका बीच औपचारिक उद्घाटन गरिएको छ । लुम्बिनी प्रदेशका पूर्व मन्त्री कृष्णा केसी ‘नमूना’ले महोत्सवको औपचारिक उद्धाटन गरिन् ।

महोत्सव उद्घाटन अघि सेतु विक चोकबाट निस्किएको विभिन्न बाजागाजा तथा लोकसंस्कृति झल्किने झाँकीसहितको ¥यालीले नगर परिक्रमा गरी वाटरपार्कमा पुगेको थियो । आर्थिक गतिविधिलाई चलायमान गर्ने उद्देश्यका साथ नेपालगञ्जको वाटरपार्कमा महोत्सव आयोजना गरिएको हो । नेपाल घरेलु तथा साना उद्योग महासङ्घ बाँकेकी अध्यक्ष मधु खड्काको सभापतित्वमा भएको उक्त कार्यक्रममा महासङ्घ नेपालगञ्ज नगर समितिकी अध्यक्ष अध्यक्ष दिला शाहले स्वागत मन्तब्य ब्यक्त गरेकी थिइन् ।

महासङ्घ बाँकेका महासचिव जीआर भुसालले सञ्चालन गरेको उक्त कार्यक्रममा प्रमुख अतिथि एवम लुम्बिनी प्रदेशका पूर्व मन्त्री नमूना, लुम्बिनी प्रदेश सभा सदस्य मिना श्रेष्ठ, नेपालगञ्ज उपमहानगरपालिकाका निर्वतमान उप मेयर उमा थापा मगर, नेपाल घरेलु तथा साना उद्योग महासङ्घका केन्द्रीय अध्यक्ष उमेशप्रकाश सिंह लगायतले आर्थिक गतिविधि चलायमान गराउन यस्ता खाले महोत्सव कोषेढुङ्गा सावित हुने बताउँदै स्थानीय उत्पादन र पर्यटनको प्रर्वद्धनसंगै बजारीकरणमा उल्लेख्य सहयोग पुग्ने भन्दै सफलताको शुभकामना दिए ।

महासंघ, बाँकेका अध्यक्ष मधुकुमारी खड्काका अनुसार महोत्सवमा १७५ स्टल बुक भइसकेका छन् । जसमध्ये व्यवसायिकका ९०, घरेलुका ५०, प्रायोजकका ८, थारु गाउँका १२ र होटल सम्बन्धि १५ स्टल रहेका छन् । महोत्सव अवलोकनका लागि टिकटको मूल्य रु. १०० राखिएको छ । विद्यार्थीहरुका लागि ५० प्रतिशत छुटको व्यवस्था गरिएको छ ।

यसैबीच सातौं प्रादेशिक औद्योगिक लघु, घरेलु तथा कृषि, व्यापार एवम् पर्यटन महोत्सवको दोस्रो दिन ज्योती मगरको बेजोड प्रस्तुति रहने आयोजकले जनाएको छ ।

प्रकाशित मिति: मंगलबार, चैत ६, २०८० २०:५७