गृहमन्त्रीको बचाउमा सरकारले संसद अधिवेशन अन्त्य गर्‍यो: कांग्रेस

राजनीति

गृहपृष्ठ
राजनीति
गृहमन्त्रीको बचाउमा सरकारले संसद अधिवेशन अन्त्य गर्‍यो: कांग्रेस

गृहमन्त्रीको बचाउमा सरकारले संसद अधिवेशन अन्त्य गर्‍यो: कांग्रेस

आइतबार, वैशाख २, २०८१ बागेश्वरी पोस्ट

काठमाडौं । सरकारको संसद अधिवेशन बन्द गर्ने निर्णयको नेपाली कांग्रेसले निन्दा गरेको छ । आज बिहान बसेको कांग्रेस संसदीय दलको बैठकले संसद अधिवेशन अन्त्य गर्ने निर्णयको विरोध गर्दै सरकारलाई गलत कदम नउठाउन चेतावनी दिएको छ ।

प्रमुख प्रतिपक्षी दल कांग्रेसका प्रमुख सचेतक रमेश लेखकले बजेट अधिवेशनको लागि पर्याप्त समय हुँदै गर्दा सरकारले अधिवेशन अन्त्य गर्ने निर्णय गर्नुको मुख्य कारण गृहमन्त्री रवि लामिछानेको बचाउ गरेको बताए । यो निर्णय अत्यन्त निन्दनीय रहेको लेखकले भने ।

सरकारको उक्त कदमको कांग्रेसले घोर आपत्ति जनाउँदै अलोकतान्त्रिक र संसदीय मूल्य मान्यताकाविरुद्ध कार्य नगर्न चेतावनी दिएको प्रमुख सचेतक लेखकले बताए ।

गृहमन्त्री लामिछाने आफैं सहकारी ठगी प्रकरणमा मुछिएको हुँदा कांग्रेसले संसदीय छानबिन समिति बनाउन माग गर्दा सरकारले गृहमन्त्रीलाई बचाउन संसद अधिवेशन नै अन्त्य गरेको लेखकले बताए ।

कांग्रेसले गृहमन्त्रीको छानबिनका लागि छानबिन समिति बनाउने मागबाट पछि नहट्ने प्रमुख सचेतक लेखकले बताए ।

प्रकाशित मिति: आइतबार, वैशाख २, २०८१ १२:००