सशस्त्र प्रहरीको नं. ३१ गणले मनायो १८ औं स्थापना दिवस, गरिएको थियो विभिन्न कार्यक्रम

सुरक्षा-अपराध

गृहपृष्ठ
सुरक्षा-अपराध
सशस्त्र प्रहरीको नं. ३१ गणले मनायो १८ औं स्थापना दिवस, गरिएको थियो विभिन्न कार्यक्रम

सशस्त्र प्रहरीको नं. ३१ गणले मनायो १८ औं स्थापना दिवस, गरिएको थियो विभिन्न कार्यक्रम

बिहीबार, वैशाख १८, २०८२ बागेश्वरी पोस्ट

बर्दिया । सीमा सुरक्षा र आन्तरिक सुरक्षामा तल्लीन सशस्त्र प्रहरी बल नं. ३१ गण बर्दियाले आफ्नो १८ औं स्थापना दिवस धुमधामका साथ मनाएको छ ।

सशस्त्र प्रहरी बल नं. ५ विन्ध्यावासिनी बाहिनी प्रमुख डीआईजी प्रदीप कुमार पालको प्रमुख आतिथ्यता तथा सशस्त्र प्रहरी बल नं. ३१ गणका एसपी मानबहादुर शाहीको अध्यक्षतामा बुधबार गुलरियास्थित गणमा आयोजित स्थापना दिवसमा विभिन्न कार्यक्रम गरिएको सशस्त्र प्रहरी बल नं.३१ गणले जानकारी दिएको छ ।

स्थापना दिवस कार्यक्रमलाई सम्बोधन गर्दै डीआईजी पालले देश र जनताको सुरक्षाको लागि अहोरात्र खटिएर सशस्त्र प्रहरी बल नं. ३१ गण बर्दियाले राज्यले दिएको जिम्मेवारीलाई उत्कृष्ट तवरले निभाएकोप्रति प्रशंसा गरेका थिए ।

साथै डीआईजी पालले सशस्त्र प्रहरी बलको परिचालनको नीतिलाई आत्मसाथ गरी संगठनको भिजन अनुसार सीमा सुरक्षा, सीमा अपराध नियन्त्रण, आन्तरिक सुरक्षा र राजस्व संकलनको अवधारणालाई प्राथमिकतामा राखी प्रभावकारी ढंगले संगठनको उद्देश्य प्राप्तिको लागि उच्च मनोबल एवं कार्यकुशलता प्रदर्शन गर्न सशस्त्र प्रहरी नं. ३१ गणका गणपतिसहित सकल दर्जालाई निर्देशन दिएका थिए ।

कार्यक्रममा उपस्थित अतिथिहरुले बर्दियाको सीमा सुरक्षा, जिल्लाको शान्ति सुरक्षा तथा विपद् व्यवस्थापनमा सशस्त्र प्रहरी बल नं. ३१ गण बर्दियाले पुऱ्याएको योगदानको मुक्तकण्ठले प्रशंसा गरेका थिए । उनीहरुले आगामी दिनमा पनि सशस्त्र प्रहरी बल नं. ३१ गणले अझ बढी कटिबद्ध र ब्यवसायिक रही जिम्मेवारी निर्वाहमा निरन्तर योगदान दिइरहने विश्वास लिएको बताएका थिए ।

'अन्तर्राष्ट्रिय सीमा सुरक्षा, सीमा स्तम्भको सुरक्षा, सीमा अपराध नियन्त्रण, लागुऔषध नियन्त्रण, मानव बेचबिखन नियन्त्रण, अबैध चोरी निकासी पैठारी बरामद मात्र नभई जिल्लाभित्र जंगली जनावरहरुको आक्रमण, विभिन्न प्रकोप, दुर्घटनाहरुमा नागरिकको जीउधनको सुरक्षाको लागि अहोरात्र परिचालित भई समस्त बर्दिया जिल्लाको शान्ति सुरक्षा अमनचयन कायम राख्नमा उल्लेखनीय भूमिका निर्वाह गर्दै आइरहेको' ३१ नं. गण प्रमुख एसपी शाहीले १८ औं स्थापना दिवसका अवसरमा शुभकामना दिँदै सो कुरा उल्लेख गरेका थिए ।

सशस्त्र प्रहरी बल नं. ३१ गणका अनुसार केक काट्नुका साथै बेलुन उडाएर सुरु गरिएको स्थापना दिवसमा शहिद परिवारहरुलाई दोसल्लाले सम्मान गरिनुका साथै उत्कृष्ट कार्य गर्ने सशस्त्र प्रहरी कर्मचारी र बिभिन्न विधातर्फको खेलमा प्रथम हुने सशस्त्र प्रहरी कर्मचारीहरुलाई पुरस्कार तथा प्रमाणपत्र बितरण गरिएको थियो ।

स्थापना दिवस कार्यक्रममा गुलरिया नगरपालिका मेयर मुक्तिनाथ यादव, मधुवन नगरपालिकाका मेयर तेजुलाल भाट, ठाकुरबाबा नगरपालिकाका मेयर तिलक लम्साल, प्रमुख जिल्ला अधिकारी रुद्रादेवी शर्मा, सुरक्षा निकाय प्रमुख, अन्य स्थानीय जनप्रतिनिधि, सरकारी निकायका प्रतिनिधि, पत्रकार, शहिद परिवार, पूर्व सशस्त्र प्रहरी, गण तथा मातहतमा कार्यरत सिनियर अधिकृत, जुनियर अधिकृत, बिल्लादार सशस्त्र प्रहरी कर्मचारी तथा जवानहरुको उपस्थिति रहेको सशस्त्र प्रहरी बल नं. ३१ गण बर्दियाले जनाएको छ ।

सशस्त्र प्रहरी नं. ३१ गणका अनुसार कार्यक्रममा बिभिन्न साँस्कृतिक झलक समेत देखाइएको थियो ।

प्रकाशित मिति: बिहीबार, वैशाख १८, २०८२ १२:०१