संस्थाको सम्पत्ति श्रीमतीको नाममा बनाई बैंकबाट डेढ करोड ऋण !

सुरक्षा-अपराध

गृहपृष्ठ
सुरक्षा-अपराध
संस्थाको सम्पत्ति श्रीमतीको नाममा बनाई बैंकबाट डेढ करोड ऋण !

संस्थाको सम्पत्ति श्रीमतीको नाममा बनाई बैंकबाट डेढ करोड ऋण !

बिहीबार, साउन १, २०८२ बागेश्वरी पोस्ट

नेपालगञ्ज । नेपालगञ्जमा रहेको गैरसरकारी संस्था शिक्षाका लागि सामाजिक जागरण (सेफ) नेपालको जग्गा पूर्व अध्यक्षले कब्जा गरेका छन् । पूर्व अध्यक्ष सुकलाल नेपालीले संस्थाको करोडौं मूल्य पर्ने जग्गा आफ्नी श्रीमती रिना बादीको नाममा पास गराएर सम्पत्ति हिनामिना गरेका हुन् ।

संस्थाले आज पत्रकार सम्मेलन गर्दै घटनाको बारेमा जानकारी गराएको हो । बादी समुदायको शिक्षा विकासमा महत्वपूर्ण भूमिका निर्वाह गर्दै आएको संस्थालाई नै समाप्त पार्ने उद्देश्यले गरिएको यस्तो कार्यले समुदायलाई ठूलो क्षति पुग्ने वर्तमान समितिको बुझाई छ । साविकको नेपालगञ्ज उपमहानगरपालिका वडा नम्बर ११ मा चार कठ्ठा जमिन (घर समेत) श्रीमती रिनालाई २७ लाखमा बेचेको कागज बनाएर सुकलालले उक्त जग्गा बैंकमा राखेर एक करोड ५० लाख रुपैयाँ ऋण समेत लिएको खुलेको छ । संस्थाको जग्गा नै बेचेपछि वर्तमान कार्यसमिति तथा बादी समुदायका व्यक्तिहरु आक्रोशमा छन् ।

संस्थापक अध्यक्ष सुकलालले माइन्यूटमा आफैंले आफूलाई अख्तियारी दिएर श्रीमतीको नाममा जग्गा बेचेको देखिन्छ । संस्थाको जग्गा व्यक्तिलाई बिक्री गर्दा सम्बन्धित कार्यालयका कर्मचारीलाई पनि मिलाएको वर्तमान कार्यसमितिको आरोप रहेको छ । बादी समुदायकी अगुवा महिला मञ्जु नेपालीले संस्थाको करोडौं पर्ने जग्गा हिनामिना गरिएको घटनाले बेच्ने कार्यमा सहयोग गर्ने मालपोत, चार किल्ला प्रमाणित गर्ने वडा कार्यालय सबैको मिलोमतोको आशंका व्यक्त गरिन् ।

सुकलालले वि.सं. २०७५ सालमै संस्थाको जग्गा श्रीमतीको नाममा पास गरेर एनआइसी एसिया बैंकबाट एक करोड ५० लाख ऋण लिएको खुलेको हो । २०८१ असार १३ गते भएको भेलाले युवालाई अगाडि सार्ने भन्दै अभिषेक नेपालीलाई अध्यक्ष बनाएपछि सम्पत्तिको खोजबिन गर्दा घोटालाको घटना बाहिर आएको हो । ‘कम्तीमा चार करोडको सम्पत्ति छ । फिर्ताका लागि हामी मुद्दा लडिरहेका छौं । ढिलो चाँडो उक्त जग्गा संस्थाको नाममा आउँछ,' अध्यक्ष अभिशेषले भने- 'हाम्रो मुद्दा नटुंगिदै बैंकले लिलाम ग¥यो भने किन्ने मान्छेसँग पनि मुद्दा लड्नुपर्ने हुन्छ ।’ २०८१ असार १३ गते संस्थाका वर्तमान अध्यक्ष अभिशेष र रिनाका बीचमा साउन १५ गतेसम्ममा जग्गा फिर्ता गरिदिने सहमति भएको थियो । जिल्ला प्रशासन कार्यालयमा भएको सहमति पनि पालना भएन । त्यसपछि संस्थापक अध्यक्ष सुकलाल र श्रीमती रिना फरार भएका छन् ।

२०८२ जेठ ४ गते बाँके जिल्ला अदालतले सुकलाल नेपालीलाई पक्राउ पूर्जी जारी गरेको छ । सात दिनमा पक्राउ नपरे ३५ दिने पक्राउ पुर्जी समेत गरी तदारुकताका साथ खोजतलास गर्दै निजलाई पक्राउ गरी अदालतमा उपस्थित गराउन आदेश जारी गरेको छ । सेफको वर्तमान कार्यसमिति एक वर्षदेखि ‘सम्पति तथा अस्तित्व बचाऊ अभियान’ मा लागिरहेको छ ।

प्रकाशित मिति: बिहीबार, साउन १, २०८२ २१:२१

प्रतिक्रिया दिनुहोस्