प्रहरीको एक महिने कारबाहीमा झण्डै साढे २३ करोड राजस्व संकलन

सुरक्षा-अपराध

गृहपृष्ठ
सुरक्षा-अपराध
प्रहरीको एक महिने कारबाहीमा झण्डै साढे २३ करोड राजस्व संकलन

प्रहरीको एक महिने कारबाहीमा झण्डै साढे २३ करोड राजस्व संकलन

शनिबार, कात्तिक १५, २०८२ बागेश्वरी पोस्ट

सौरभ गिरी/काठमाडौं । नेपाल प्रहरीले आर्थिक वर्ष २०८२-०८३ को असोज महिनाभरमा झण्डै साढे २३ करोड रुपैयाँ राजस्व संकलन गरेको छ । देशभरमा प्रहरीले गरेको कारबाहीमा गत असोज महिनामा २३ करोड ४३ लाख ८३ हजार ३४० रुपैयाँ बराबरको राजस्व संकलन गरेको प्रहरी प्रधान कार्यालयले जानकारी दिएको छ ।

प्रहरी प्रधान कार्यालयका अनुसार गत असोज मसान्तसम्म अदालती फैसला कार्यान्वयनतर्फ २ करोड ८० लाख ४० हजार ३६६ रुपैयाँ राजस्व संकलन हुँदा ट्राफिक कारबाहीबाट ३ करोड ७३ लाख १३ हजार ५०९ रुपैयाँ बराबर राजस्व संकलन गरेको प्रधान कार्यालयले जनाएको छ ।

त्यसैगरी प्रहरीले १ करोड ५८ लाख ७० हजार ८४५ रुपैयाँ बराबरको अवैध सुन बरामद गरेको छ । असोजभरको एक महिनाको अवधिमा १५ करोड २४ लाख २९ हजार २१४ रुपैयाँको अवैध सामान बरामद गरेको हो । प्रहरी प्रधान कार्यालयका अनुसार प्रहरीले श्रोत नखुलेको १९ लाख ६४ हजार रुपैयाँ बरामद गर्दा अवैध नदीजन्य पदार्थको अवैध उत्खननको कारबाहीबाट ७ लाख ६३ हजार २८६ रुपैयाँ राजस्व संकलन गरेको छ ।

प्रहरीले साउनमा ७ लाख ६५ हजार रुपैयाँको अवैध काठ बरामद गरेको प्रहरी प्रधान कार्यालयले जानकारी दिएको छ । त्यसैगरी २८ लाख २४ हजार ३९० रुपैयाँको अवैध पशुपंछी, १ लाख ६ हजार ४९६ रुपैयाँ बराबरको अवैध मुद्रा बरामद गरेको प्रहरी प्रधान कार्यालयले जनाएको छ ।

प्रहरीको कारबाहीमा असोज महिनामा अवैध चाँदीतर्फ २ लख ४६ हजार ३०४ रुपैयाँ बरामद गरेको प्रहरी प्रधान कार्यालयले जानकारी दिएको छ ।

प्रकाशित मिति: शनिबार, कात्तिक १५, २०८२ १३:००

प्रतिक्रिया दिनुहोस्