बर्दियाको राजापुर गोलीकाण्ड: मुख्य फरार अभियुक्त महावीर चौधरी कैलालीबाट बर्दिया प्रहरीको नियन्त्रणमा

सुरक्षा-अपराध

गृहपृष्ठ
सुरक्षा-अपराध
बर्दियाको राजापुर गोलीकाण्ड: मुख्य फरार अभियुक्त महावीर चौधरी कैलालीबाट बर्दिया प्रहरीको नियन्त्रणमा

बर्दियाको राजापुर गोलीकाण्ड: मुख्य फरार अभियुक्त महावीर चौधरी कैलालीबाट बर्दिया प्रहरीको नियन्त्रणमा

बिहीबार, मंसिर २५, २०८२ बागेश्वरी पोस्ट

बर्दिया । बर्दियाको राजापुर नगरपालिका–४ स्थित ‘हमार थारु घर एण्ड रेष्टुरेन्ट’ मा भएको गोलीकाण्डका मुख्य आरोपी महावीर चौधरीलाई प्रहरीले पक्राउ गर्न सफल भएको छ । जिल्ला प्रहरी कार्यालय बर्दियाबाट प्रहरी वरिष्ठ नायब निरीक्षक (वरिष्ठ सई) डेनी स्वारको कमाण्डमा गएको ४ जना र इलाका प्रहरी कार्यालय राजापुरका इन्स्पेक्टरको टोलीले गोप्य सूचनाका आधारमा महावीरलाई कैलालीको कैलारी गाउँपालिका–१ मझरा गाउँमा लुकेर बसेको अवस्थामा आज बिहान ३ बजे नियन्त्रणमा लिएको हो ।

तुलसीपुर-६ का ५१ वर्षीय महावीरले मंसिर २० गते बिहान आफ्नै होटलमा दाङको तुलसीपुर-६ कै २८ वर्षीय निरज चौधरीमाथि गोली प्रहार गरी हत्या गरेका थिए । मृतक निरज र महावीर नाताका आफन्त रहेको प्रहरीले जनाएको छ ।

प्रहरी अनुसन्धानले महावीरले निरजलाई ‘तल्लो बाटो’ प्रयोग गरी अमेरिका पठाइदिने भन्दै विगतमा लाखौँ रुपैयाँ असुलेको र सोही रकम फिर्ता माग्दा विवाद चर्किएपछि उनले गोली प्रहार गरेको पुष्टि गरेको छ । घटनास्थलबाट प्रहरीले पेस्तोलको गोलीको खोका, महावीरको पासपोर्ट तथा भिजा समेत बरामद गरेको थियो । हत्यामा प्रयोग भएको पेस्तोलसमेत बरामद गरिएको जिल्ला प्रहरी कार्यालय बर्दियाले जानकारी दिएको छ ।

गोली प्रहारपछि निरज भुइँमा ढले पनि महावीरले नजिकको बर्दिया जिल्ला अस्पतालमा नपुर्‍याई बाँकेको नेपालगञ्जस्थित सञ्जीवनी अस्पताल पठाएका थिए । अस्पताल पुगेपछि चिकित्सकले निरजलाई मृत घोषणा गरेका थिए । निरजको मृत्यु पुष्टि भएपछि महावीर घटनास्थलबाट फरार भएका थिए ।

यस घटनामा महावीरकी साली रामकुमारी थारु, उनका श्रीमान बुद्धि थारु तथा २२ वर्षीय छोरा राहुल थारुलाई प्रहरीले सोही दिन नियन्त्रणमा लिएको हो । घटनास्थलको प्रमाण मेटाउने, सरसफाई गर्ने लगायत क्रियाकलापमा उनीहरूको संलग्नता रहेको प्रहरी निरीक्षक तथा जिल्ला प्रहरी कार्यालय बर्दियाका निमित्त प्रवक्ता प्रकाशसिंह कार्कीले बताएका छन् ।

हत्याकाण्डसँग राजनीतिक परिवारको नाता पनि जोडिएको देखिएको छ । महावीर लुम्बिनी प्रदेशका पूर्व मुख्यमन्त्री तथा नेपाली कांग्रेस लुम्बिनी संसदीय दलका नेता डिल्ली बहादुर चौधरीका सहोदर साइँला भाई हुन् । मृतक निरज समेत महावीरकै दाजु डिल्लीबहादुर चौधरीको राजापुरस्थित पोल्ट्री फार्म हेर्ने कामका लागि त्यही क्षेत्रमा बस्दै आएका थिए ।

महावीर भारत भाग्न सक्ने आशंकामा बर्दिया प्रहरीले बाँके, कैलाली प्रहरी र भारतीय सशस्त्र सीमा बल (एसएसबी) सहित भारतीय प्रहरीसँगसमेत समन्वय गरेर सीमा नाकामा कडा निगरानी बढाएको थियो । कडाईका कारण भाग्न नसकेका महावीर अन्ततः कैलालीमा लुकेको अवस्थामा वरिष्ठ सई डेनीको टोलीले पक्राउ गर्दै उनको सीमापार भाग्ने योजनालाई विफल पार्न सफल भएको हो ।

पक्राउ परेका महावीरलाई प्रारम्भिक कानुनी प्रक्रिया पूरा गरी इलाका प्रहरी कार्यालय राजापुरक जिम्मा लगाइएको छ । घटनासम्बन्धी थप विस्तृत अनुसन्धान जारी रहेको जिल्ला प्रहरी कार्यालय बर्दियाले जनाएको छ ।

प्रकाशित मिति: बिहीबार, मंसिर २५, २०८२ १३:०७

प्रतिक्रिया दिनुहोस्