नेपालगञ्जमा चोरीका घटना बढ्न थाले, वडा नम्बर १३ मा दुई पसलमा चोरी

सुरक्षा-अपराध

गृहपृष्ठ
सुरक्षा-अपराध
नेपालगञ्जमा चोरीका घटना बढ्न थाले, वडा नम्बर १३ मा दुई पसलमा चोरी

नेपालगञ्जमा चोरीका घटना बढ्न थाले, वडा नम्बर १३ मा दुई पसलमा चोरी

आइतबार, पुस १३, २०८२ बागेश्वरी पोस्ट

नेपालगञ्ज । बाँके जिल्लाको सदरमुकाम नेपालगञ्जमा फेरि चोरीका घटना बढ्न थालेका छन् । केही महिना अघि व्यापकरुपमा चोरीका घटना हुने गरेको थियो । प्रहरी सक्रियतापछि चोरीका घटनामा कमी आए पनि चिसोको मौका छोपेर पछिल्लो केही दिन यता फेरि चोरीका घटना बढ्न थालेका छन् । विशेषतः चोरहरुले पसलहरुमा चोरी गर्न थालेका छन् ।

चोरीको पछिल्लो घटनामा गएराति नेपालगञ्ज वडा नम्बर १३ बुलबुलिया शान्तिनगरस्थित दुई पसलमा एकै समयमा चोरी भएको छ । सो वडामा रहेको नीलसागर आश्रमको ठिक अगाडिको सरिया, सिमेन्ट र पेन्ट पसल, रक्सी पसलमा चोरी भएको छ । चोरहरुले उक्त पसलहरुवाट नगद तथा जिन्सी सामानहरु चोरेर लगेका छन् । आज बिहान आठ बजे पसल खोल्ने क्रममा सटर तोडिएको देखिएपछि चोरी भएको थाहा भएको थियो । तत्काल प्रहरीलाई खबर गर्दा ढिलो गरी डेढ घण्टापछि मात्र प्रहरी पुगेकोमा स्थानीयहरुले गुनासो पोखेका छन् ।

यो वडाको यस क्षेत्रमा पटक-पटक चोरीका घटना घटिरहेको अवस्थामा समेत प्रहरीको उपस्थिति यहाँ शून्य प्रायः हुने गरेको स्थानीयहरु बताउँछन् । ‘प्रहरीले यो क्षेत्रलाई पूर्णरुपमा उपेक्षा गरेको मात्र हैन, यहाँ प्रहरीको छायाँ पनि परेको देखिँदैन’-एक स्थानीयको गुनासो थियो ।

यस सम्बन्धमा जिल्ला प्रहरी कार्यालय बाँकेका प्रमुख प्रहरी उपरीक्षक अंगुर जिसीले उक्त क्षेत्रलाई ‘शान्त’ क्षेत्रका रुपमा लिएकाले पनि प्रहरी गस्ती हुन नसकेको स्विकारे । उनको थप भनाई थियो,‘अर्कोतर्फ, प्रहरी संख्या प्रशस्त हुँदा समेत सवारी साधनको अभावमा प्रहरी गस्ती बढाउन नसकिएको हो ।'

प्रकाशित मिति: आइतबार, पुस १३, २०८२ २१:३५

प्रतिक्रिया दिनुहोस्