नेपालगञ्ज बसपार्कमा बसभित्रै पसेर लुटपाट गर्ने चार जना हतियारधारी लुटेरा पक्राउ

सुरक्षा-अपराध

गृहपृष्ठ
सुरक्षा-अपराध
नेपालगञ्ज बसपार्कमा बसभित्रै पसेर लुटपाट गर्ने चार जना हतियारधारी लुटेरा पक्राउ

नेपालगञ्ज बसपार्कमा बसभित्रै पसेर लुटपाट गर्ने चार जना हतियारधारी लुटेरा पक्राउ

बिहीबार, चैत १९, २०८२ बागेश्वरी पोस्ट

नेपालगञ्ज । बाँकेको नेपालगञ्ज उपमहानगरपालिका वडा नम्बर ४ स्थित बसपार्कमा यात्रुहरूलाई लक्षित गरी हातहतियार देखाएर डाँका चोरी घटनामा संलग्न चार जनालाई प्रहरीले पक्राउ गरेको छ ।

जिल्ला प्रहरी कार्यालय बाँकेका अनुसार मंगलबार नेपालगञ्जबाट काठमाडौँ जाने बसमा सवार चार जना यात्रुमाथि ६/७ जनाको हतियारधारी समूहले धाकधम्की दिँदै कुटपिट गर्दै नगद तथा जिन्सी सामान लुटपाट गरेको थियो । उक्त समूहले पीडितहरूबाट नगद ५९ हजार रुपैयाँ र मोबाइल तथा अन्य सामान जबरजस्ती खोसेर फरार भएका थिए ।

घटनाबारे जानकारी प्राप्त हुनासाथ प्रहरीले खोजतलास तीव्र बनाएको थियो । सोही क्रममा प्रहरीले बुधबार घटनामा संलग्न चार जनालाई नियन्त्रणमा लिएको बाँके प्रहरीले जनाएको छ । पक्राउ परेकाहरूबाट घटनामा प्रयोग गरिएको कटुवा पेस्तोल र खुकुरी समेत बरामद गरिएको छ ।

पक्राउ पर्नेहरूमा नेपालगञ्ज उपमहानगरपालिका–१९ का २४ वर्षीय रामु परियार, वडा नम्बर ४ का २८ वर्षीय सुवास बिष्ट, २६ वर्षीय संजय क्षेत्री तथा कोहलपुर नगरपालिका–५ का १९ वर्षीय सन्दीप जंग क्षेत्री रहेको बाँके प्रहरीले जनाएको छ ।

प्रहरीले घटनामा संलग्न अन्य फरार व्यक्तिहरूको खोजी कार्य जारी रहेको जनाएको छ भने पक्राउ परेकामाथि आवश्यक अनुसन्धान भइरहेको छ ।