बोलेरो जिप ४ सय मिटर तल खसेर दुर्घटना: दुई जनाको मृत्यु, तीन घाइते

समाचार

गृहपृष्ठ
समाचार
बोलेरो जिप ४ सय मिटर तल खसेर दुर्घटना: दुई जनाको मृत्यु, तीन घाइते

बोलेरो जिप ४ सय मिटर तल खसेर दुर्घटना: दुई जनाको मृत्यु, तीन घाइते

शनिबार, साउन २, २०८३ बागेश्वरी पोस्ट

डडेल्धुरा । सडकदेखि ४ सय मिटर तल खसेको बोलेरो जिप दुर्घटना हुँदा दुई जनाको मृत्यु हुनुका साथै चालकसहित तीन जना घाइते भएका छन् ।

भीमदत्त राजमार्ग अन्तर्गत डडेल्धुराको अमरगढी नगरपालिका–७ खर्स्याखानमा आज बिहान २ बजे सुदूरपश्चिम प्रदेश ०१–००१ ज १८५० नम्बरको बोलेरो जिप दुर्घटना हुँदा दुई जनाको मृत्यु भएको प्रहरीले जानकारी दिएको छ ।

प्रहरीका अनुसार धनगढीबाट दार्चुलातर्फ जाँदै गरेको बोलेरो जिप दुर्घटनामा दार्चुलाको अपिहिमाल गाउँपालिका–१ का ४५ वर्षीय सुगन लोथ्याल र सोही स्थानका करिब २८ वर्षीय हनु लोथ्यालको मृत्यु भएको हो ।

त्यस्तै दुर्घटनामा दार्चुलाको मार्मा गाउँपालिकाका ५० वर्षीय अमरसिंह ठगुन्ना, अपिहिमाल गाउँपालिका–१ का ३५ वर्षीया सरस्वती लोथ्याल तथा बैतडीको डिलासैनी गाउँपालिका–२ का जिप चालक अमृत घरेडी घाइते भएको प्रहरीले जनाएको छ । उनीहरूको डडेल्धुरा अस्पतालमा उपचार भइरहेको प्रहरीले जनाएको छ ।

यता प्रहरीले घटनाबारे थप अनुसन्धान सुरु भएको जनाउँदै हालसम्म दुर्घटनाको कारण अझै खुल्न नसकेको बताएको छ ।

प्रकाशित मिति: शनिबार, साउन २, २०८३ ०७:५६

प्रतिक्रिया दिनुहोस्