भोटेकोसी बाढीपीडितका लागि प्याब्सन बाँकेद्वारा ६५ लाख सहयोग

शिक्षा

गृहपृष्ठ
शिक्षा
भोटेकोसी बाढीपीडितका लागि प्याब्सन बाँकेद्वारा ६५ लाख सहयोग

भोटेकोसी बाढीपीडितका लागि प्याब्सन बाँकेद्वारा ६५ लाख सहयोग

बिहीबार, भदौ २५, २०८३ बागेश्वरी पोस्ट

नेपालगन्ज । भोटेकोसीमा आएको बाढीका कारण ज्यान गुमाएका, बेपत्ता तथा घाइते भएका र बाढीबाट प्रभावित परिवारका लागि निजी तथा आवासीय विद्यालयहरूको संगठन प्याब्सन बाँकेले करिब ६५ लाख रुपैयाँ राहत सहयोग गरेको छ ।

प्याब्सन बाँकेमा आबद्ध विभिन्न विद्यालयले विद्यार्थी, शिक्षक तथा अभिभावकबाट संकलन गरेको रकम बाढीपीडितका लागि सहयोग गरिएको हो । प्याब्सन बाँकेले बिहीबार नेपालगन्जमा पत्रकार सम्मेलन गरी राहत सहयोगसम्बन्धी विवरण सार्वजनिक गरेको हो ।

प्याब्सन बाँकेका जिल्ला अध्यक्ष विकास बज्राचार्यका अनुसार जिल्लाका विभिन्न ७७ वटा विद्यालयले प्याब्सन बाँकेलाई ५३ लाख ४१ हजार ४ सय ६ रुपैयाँ हस्तान्तरण गरेका छन् । केही विद्यालयले भने प्रधानमन्त्री दैवी प्रकोप उद्धार कोषमा सिधै रकम जम्मा गरिसकेका छन् । बज्राचार्यले प्याब्सन बाँकेमा आबद्ध विद्यालयहरूबाट संकलित कुल रकम करिब ६५ लाख रुपैयाँ रहेको जानकारी दिए । केन्द्रबाट औपचारिक परिपत्र आउनुअघि नै केही विद्यालयले स्वतःस्फूर्त रूपमा प्रधानमन्त्री दैवी प्रकोप उद्धार कोषमा रकम जम्मा गरेको उनले बताए ।

‘प्याब्सन केन्द्रबाट परिपत्र आउनुअघि नै केही विद्यालयले प्रधानमन्त्री दैवी प्रकोप उद्धार कोषमा स्वतःस्फूर्त रूपमा रकम जम्मा गरिसक्नुभएको थियो,’ उनले भने, ‘केन्द्रबाट परिपत्र आएपछि हामीले सबै विद्यालयलाई जानकारी गरायौं । त्यसपछि संस्थागत रूपमा बाढीपीडितका लागि सहयोग रकम संकलन भएको हो ।’

पत्रकार सम्मेलनमा प्याब्सन बाँकेका विपद् व्यवस्थापन संयोजक महेन्द्र शर्माले विभिन्न विद्यालयबाट संकलित रकमको चेक जिल्ला अध्यक्ष बज्राचार्यलाई हस्तान्तरण गरेका थिए । अध्यक्ष बज्राचार्यले उक्त चेक प्याब्सन केन्द्रीय प्राज्ञिक परिषद्का सदस्य डा. राजेश केशर खनाललाई हस्तान्तरण गरे ।

डा. खनालका अनुसार प्याब्सन बाँकेबाट प्राप्त रकम प्याब्सन केन्द्रीय समितिको खातामा जम्मा गरिनेछ । देशभरका विद्यालय तथा प्याब्सनका विभिन्न संरचनाबाट संकलित रकम एकमुष्ट रूपमा प्रधानमन्त्री दैवी प्रकोप उद्धार कोषमा जम्मा गर्ने तयारी रहेको उनले बताए । ‘देशमा परेको महाविपद्का समयमा प्याब्सन सरकारको साथमा छ,’ उनले भने ।

प्याब्सन लुम्बिनी प्रदेशका सल्लाहकार ऋषिकेश जिसीले भोटेकोसी बाढीले निम्त्याएको विपद्का कारण देशभरका नागरिक संवेदनशील बनेको बताए । राहत संकलनमा विद्यार्थी समेत सक्रिय भएको उल्लेख गर्दै उनले कतिपय विद्यार्थीले आफ्नो खाजा खर्च कटाएर बाढीपीडितलाई सहयोग गरेको बताए ।

प्याब्सन केन्द्रीय समितिले देशभरबाट १० करोड रुपैयाँ संकलन गरी सरकारलाई हस्तान्तरण गर्ने तयारी गरेको प्याब्सन बाँकेका कोषाध्यक्ष प्रबीण गिरीले बताए । पत्रकार सम्मेलनमा विपद् व्यवस्थापन संयोजक शर्माले विभिन्न विद्यालयबाट संकलित सहयोग रकमको विवरण सार्वजनिक गरेका थिए । कार्यक्रममा प्याब्सन बाँकेका उपाध्यक्ष शरदचन्द्र रावलले स्वागत मन्तव्य ब्यक्त गरेका थिए ।

प्रकाशित मिति: बिहीबार, भदौ २५, २०८३ २०:५०

प्रतिक्रिया दिनुहोस्