ठूलो परिमाणमा प्रतिबन्धित औषधि ट्रामाडोल बरामद

सुरक्षा-अपराध

गृहपृष्ठ
सुरक्षा-अपराध
ठूलो परिमाणमा प्रतिबन्धित औषधि ट्रामाडोल बरामद

ठूलो परिमाणमा प्रतिबन्धित औषधि ट्रामाडोल बरामद

सोमबार, भदौ २९, २०८३ बागेश्वरी पोस्ट

नेपालगञ्ज । सशस्त्र प्रहरीले बाँकेको खजुरास्थित सैनिक क्षेत्र नजिकबाट भारतबाट अवैध रूपमा ल्याइएको ठूलो परिमाणमा प्रतिबन्धित औषधि ट्रामाडोल बरामद गरेको छ ।

सशस्त्र प्रहरी बल, नेपाल नम्बर ३० गण बागेश्वरी बाँकेका अनुसार बीओपी बढैया अन्तर्गतको सुरक्षा पोस्ट सैनिकबाट आज दिउँसो सवा २ बजे सशस्त्र प्रहरी नायब निरीक्षक पदम खड्काको कमान्डमा खटिएको पाँच जनाको टोलीले खजुरा गाउँपालिका–१ स्थित बेलडाँडाबाट ४ हजार ३ सय २० पत्ता (४३ हजार २ सय क्याप्सुल) ट्रामाडोल बरामद गरेको हो ।

भारतबाट अवैध रूपमा ल्याइएको उक्त ट्रामाडोलसँगै भे ६ प ६०२६ नम्बरको मोटरसाइकल समेत नियन्त्रणमा लिइएको सशस्त्र प्रहरीले जनाएको छ । अवैध ओसारपसार, सीमा अपराध नियन्त्रण तथा लागूऔषधविरुद्धको कारबाहीलाई प्रभावकारी बनाउने उद्देश्यले सशस्त्र प्रहरी बल नेपाल बाँकेको निर्देशन अनुसार टोली परिचालन गरिएको थियो ।

सशस्त्र प्रहरीको टोलीलाई देख्नासाथ मोटरसाइकलमा प्रतिबन्धित औषधि लिएर आउँदै गरेका व्यक्ति ट्रामाडोल र मोटरसाइकल छाडेर फरार भएका थिए । प्रतिबन्धित औषधि लिएर आउने व्यक्तिको पहिचान तथा खोजतलास भइरहेको सशस्त्र प्रहरीले जनाएको छ ।

बरामद ट्रामाडोल र नियन्त्रणमा लिइएको मोटरसाइकललाई आवश्यक अनुसन्धान तथा कारबाहीका लागि सम्बन्धित निकायमा बुझाउने तयारी भइरहेको सशस्त्र प्रहरीले जनाएको छ ।

प्रकाशित मिति: सोमबार, भदौ २९, २०८३ १६:२३

प्रतिक्रिया दिनुहोस्