यसपालि नेपालगन्जमा रामलीला हुँदै

संस्कृति-साहित्य

गृहपृष्ठ
संस्कृति-साहित्य
यसपालि नेपालगन्जमा रामलीला हुँदै

यसपालि नेपालगन्जमा रामलीला हुँदै

बिहीबार, असोज १, २०८३ बागेश्वरी पोस्ट

नेपालगन्ज । नेपालगन्जमा ऐतिहासिक रामलीला सञ्चालनको तयारी गरिएको छ । बडादशैंको अवसरमा १५८ वर्षदेखि निरन्तर सञ्चालन हुँदै आएको रामलीला गत वर्ष प्रतिकूल परिस्थितिका कारण नियमित रूपमा मञ्चन हुन नसके पनि रावण दहन कार्यक्रम भने गरिएको थियो ।

नेपालगन्जको पहिचानका रूपमा स्थापित रामलीलाको यस वर्ष १५९औँ शृंखला असोज २५ गते घटस्थापनाका दिनदेखि सुरु हुने भएको छ । नेपालगन्जस्थित रामलीला मैदानमा दस दिनसम्म रामलीला मञ्चन गरिनेछ ।

शोभायात्रासहित रामलीलाको विधिवत् शुभारम्भ गर्ने तयारी गरिएको रामलीला सञ्चालक समितिले जनाएको छ ।रामलीला सञ्चालक समितिको बुधबार सम्पन्न साधारणसभाले यस वर्षको रामलीला मञ्चनलाई भव्य र व्यवस्थित बनाउने लगायतका विभिन्न निर्णय गरेको छ । त्यसका लागि विभिन्न उपसमिति समेत गठन गरिएको छ ।

समितिका अनुसार यस वर्ष भारतको वृन्दावनबाट राधा रमणको नेतृत्वमा कलाकार टोली ल्याएर रामलीला मञ्चन गरिनेछ । प्रतिकूल परिस्थितिका बाबजुद नेपालगन्जको पहिचान, संस्कृति र अस्तित्वसँग रामलीला मञ्चन जोडिएकाले यसको निरन्तरताका लागि पहल गरिएको रामलीला सञ्चालक समितिका अध्यक्ष सन्तोषकुमार कनोडियाले बताए ।

रामलीलामा भगवान् राम र सीताको जीवनीसँग सम्बन्धित विभिन्न कथालाई नाटकीय शैलीमा प्रस्तुत गर्ने गरिन्छ । अध्यक्ष कनोडियाका अनुसार हरेक दिन साँझ ८ बजेदेखि राति १२ बजेसम्म रामलीला मञ्चन हुनेछ ।

प्रकाशित मिति: बिहीबार, असोज १, २०८३ १४:३७

प्रतिक्रिया दिनुहोस्