बाँकेमा ६ महिनामा ४ सय ६८ फरार प्रतिवादी पक्राउ

सुरक्षा-अपराध

गृहपृष्ठ
सुरक्षा-अपराध
बाँकेमा ६ महिनामा ४ सय ६८ फरार प्रतिवादी पक्राउ

बाँकेमा ६ महिनामा ४ सय ६८ फरार प्रतिवादी पक्राउ

शनिबार, पुस ११, २०७७ बागेश्वरी पोस्ट

जिल्ला प्रहरी कार्यालय बाँके

नेपालगञ्ज । बाँकेमा पछिल्लो ६ महिनामा ४ सय ६८ फरार प्रतिवादी पक्राउ परेका छन् ।

पछिलो समय कतिपयले पक्राउ पर्ने डरका कारण आफैं अदालतमा आत्मसमर्पण समेत गरेको बाँके प्रहरी प्रमुख प्रहरी उपरिक्षक (एसपी) ओम बहादुर रानाले बताउनुभयो । कतिपय पक्राउ पर्ने डरले गाउँ नै छाडेर भारततिर पलायन भइरहेका छन् । यसले पनि गाउँमा शान्ति सुरक्षा सृदृढ भएको रानाले बताउनुभयो ।

एसपी रानाका अनुसार पछिलो समय लुटपाट, कुटपिट तथा अपराधजन्य गतिविधिमा रोकथाम भएको छ । बाँकेमा आफू बस्दासम्म एक हजार जना फरार प्रतिवादी पक्राउ गर्ने योजना रहेको एसपी रानाले बताउनुभयो । उहाँका अनुसार यसरी पक्राउ पर्ने फरार प्रतिवादीमा कर्तव्य ज्यान, ज्यान मार्ने उद्योग, चोरी, कुटपिट, लुटपाट, बलात्कार, जुवातास, बहुविवाह लगायतका घटनामा संलग्न रहेका व्यक्ति छन् । जसमा असारमा ८ जना, साउनमा ५६ र भदौमा २०७ जना पक्राउ परेका छन् । त्यस्तै असोजमा ७, कार्तिकमा ३, मंसिरमा ५२ र पुषमा १ जना विविध घटनामा संलग्न फरार प्रतिवादी पक्राउ परी कानुनी दायरामा ल्याइएका छन् ।

नेपालगञ्ज आउँदा एसपी रानाले आफ्नो कार्यकालमा गर्ने मुख्य १७ बुँदे कामको कार्ययोजना अगाडि सार्नुभएको थियो । जसमा उहाँले लागूऔषध, शान्ति सुरक्षा, आपराधिक गतिविधि नियन्त्रणलाई मुख्य प्राथमिकता बताउनुभएको थियो । त्यसै अनुरूप अहिले बाँके प्रहरीले यी योजनामा सफलता हासिल गर्दै गएको प्रहरी प्रमुख रानाको भनाई छ ।

प्रकाशित मिति: शनिबार, पुस ११, २०७७ २०:०४

प्रतिक्रिया दिनुहोस्