गुल्मीमा आपराधिक क्रियाकलाप बढ्दै

सुरक्षा-अपराध

गृहपृष्ठ
सुरक्षा-अपराध
गुल्मीमा आपराधिक क्रियाकलाप बढ्दै

गुल्मीमा आपराधिक क्रियाकलाप बढ्दै

आइतबार, माघ १८, २०७७ बागेश्वरी पोस्ट

तम्घास । गुल्मीमा आपराधिक क्रियाकलाप बढ्दै गएको छ । झारफुकको नाममा तातो पन्यूले डामेर हत्या, विद्यालयमै विद्यार्थीमाथि निर्घात कुटपिटदेखि किसानका गोठमा आगलागीसम्मका घटना घटेका छन् ।

घटनाका अपराधी पत्ता लगाउन नसक्दा जिल्लामा शान्ति सुरक्षाको चुनौती बढ्दै गएको हो । इस्मा गाउँपालिका–१ का मोतिबहादुर कुँवरको गत भदौ २१ गते आफ्नै पसलमा विभत्स हत्या भयो । हत्या भएको करिब पाँच महिना पुग्न थाल्यो । गुल्मी प्रहरीले अहिलेसम्म अपराधमा संलग्न व्यक्ति पत्ता लगाउन सकेको छैन ।

लामो समयसम्म हत्या किन र कसले गरेको भन्ने विषय अन्योल भएका कारण स्थानीयवासीमा त्रास बढ्दै गएको छ । “मृतकका केही आफन्त र अन्य महिलामाथि पनि प्रहरीले शङ्का गरेको थियो,” स्थानीय वीरबहादुर खत्रीले भन्नुभयो, “अहिलेसम्म पनि हत्यारा पत्ता नलाग्दा स्थानीयवासीमा त्रास बढ्दै गएको छ ।” रेसुङ्गा नगरपालिका–१४ पराल्मीका ४५ वर्षीय तुलबहादुर विक यही माघ ३ गते बिहान ११ बजे जङ्गलमा घाँस काट्न जानुभएको थियो । सोही दिन दिउँसो २ः३० बजेतिर गुल्मीदरबार गाउँपालिका–१ को बलिथुममा उहाँ मृत भेटिनुभयो ।

उहाँको छातीमा बन्दुकका छर्रा थिए । दिउँसै बन्दुकले हानेर विकको हत्या भएपछि स्थानीयवासीमा त्रास बढेको छ । गाउँमा मजदुरी गरेर परिवार पालेका विकको हत्यापछि परिवार शोकमा छन् । हत्यामा संलग्न अहिलेसम्म पत्ता लागेका छैनन् । त्यस्तै गत पुस २६ गते चार युवाले जिल्ला सदरमुकाममै रहेको महेन्द्र माविको कक्षा १२ मा पढ्ने इस्मा गाउँपालिका–३ का माधव पछाईँलाई मरणासन्न हुने गरेर कुटपिट गरे । पीडित परिवारले प्रहरीमा चार जनाविरुद्ध किटानी जाहेरी दिएका दिए ।

ती मध्येका दुई हिरासतमा छन् भने बाँकि दुई अझै फरार छन् । तम्घासकै मुख्य बजारमा झारफुकको नाममा तातो पन्यू र अन्य धातुले हानेर इस्मा–३ दर्लामचौरका ६४ वर्षीय रामबहादुर मुखियाको गत पुस २९ गते ज्यान गयो भने दुई गम्भीर घाइते भए । बिपन्न मुखिया परिवार शोकमा डुबेका छन् । दोषीलाई कडा भन्दा कडा कारवाही हुनुपर्ने माग उनीहरुको छ । “रोग सञ्चो गराउने नाममा बुवालाई गुमाउनुपर्यो”, मृतकका जेठा छोरा हुमबहादुर मुखियाले भन्नुभयो, “घटनाका दोषीलाई कडा भन्दा कडा कारवाही हुनुपर्यो ।” यस्तै जिल्लामा हत्याका घटना मात्र होइन्, किसानमाथि पनि आक्रमण भइरहेको छ ।

चन्द्रकोट गाउँपालिका–३ हर्राचौरका शौभाग्य शाहको बाख्रा फार्ममा अपरिचित व्यक्तिले गत पुस २३ गते आगो लगाइदिए । छिनभरमै फार्ममा रहेका २५ बाख्रा मरे । फार्मको संरचनासहित ७० लाख भन्दा बढीको क्षति भयो । मालिका गाउँपालिका–७ घमिरका मुमानन्द लम्सालको केरा बगानमा गत पुस २७ गते राति अपरिचित व्यक्तिले केरा फडानी गरे । त्यसका साथै पाइप र सिँचाईका सामग्रीमा क्षति गरे । तर, दुवै घटनामा संलग्न अहिलेसम्म पत्ता लागेका छैनन् ।

गुल्मीदरबार गाउँपालिका–४ का ३८ वर्षीय नारायण पाध्य शर्मा चुडालीविरुद्ध जिल्ला प्रहरी कार्यालयमा गत मङ्सिर ८ गते मानव बेचबिखनविरुद्धको मुद्दा दर्ता भयो । उनले गत कात्तिक २६ गते स्थानीय १७ वर्षीया बालिकालाई भारत लगेका थिए । आरोपितविरुद्ध जिल्ला अदालतले मङ्सिर १० गते पक्राउ पूर्जीसमेत जारी गर्यो । तर आरोपित गाउँमै डुलेर बस्दा समेत प्रहरीले आरोपितलाई पक्राउ गर्न सकेको छैन । जिल्ला प्रहरी कार्यालयका प्रहरी नायब उपरिक्षक पुरुषोत्तमप्रसाद पाण्डेयले सबै घटनाका बारेमा प्रहरीले सुक्ष्म अनुसन्धान गरिरहेको जानकारी दिनुभयो ।

कतिपय घटनास्थल टाढा भएकाले जिल्लाको टिम जान नपाएको उहाँले बताउनुभयो । साथै स्थानीयवासीबाट राम्रो साथ र समन्वय नहुँदा पनि समस्या भएको उहाँको भनाई छ । प्रमुख जिल्ला अधिकारी रुद्रादेवी शर्माले जिल्लामा भएका घटनाप्रति आफूहरु गम्भीर रहेको बताउनुभयो । प्रशासन नजिकै घटेका घटनाले आफूहरुको चित्त दुखेको जनाउँदै उहाँले घटनाका विषयमा सुरक्षा समितिमा समिक्षा भएको बताउनुभयो ।

प्रकाशित मिति: आइतबार, माघ १८, २०७७ १०:५२

प्रतिक्रिया दिनुहोस्