भागरथी हत्या घटना अनुसन्धानमा उत्कृष्ट भूमिका खेलेका दुई जना प्रहरीको बढुवा

सुरक्षा-अपराध

गृहपृष्ठ
सुरक्षा-अपराध
भागरथी हत्या घटना अनुसन्धानमा उत्कृष्ट भूमिका खेलेका दुई जना प्रहरीको बढुवा

भागरथी हत्या घटना अनुसन्धानमा उत्कृष्ट भूमिका खेलेका दुई जना प्रहरीको बढुवा

बिहीबार, फागुन १३, २०७७ बागेश्वरी पोस्ट

नेपालगन्ज।बैतडी दोगडाकेदार गाउँपालिका ७ चडेपानीस्थित सनातन माध्यामिक विद्यालय बैतडीमा अध्ययनरत १७ वर्षीया भागरथी भट्टको गत माघ २१ गते जबरजस्ती करणीपछि हत्या घटना अनुसन्धानमा संलग्न भएका दुई जना प्रहरीलाई बढुवा गरिएको छ।

अनुसन्धानमा उत्कृष्ट भूमिका खेलेका प्रहरी सहायक निरीक्षक पदमबहादुर थापा र प्रहरी जवान नरबहादुर थापालाई प्रहरी प्रधान कार्यालयले एक तह बढुवा गरेको छ। उनीहरु दुवै जनालाई सुदूरपश्चिम प्रदेश प्रहरी प्रमुख डिआइजी उत्तम सुवेदीले आज बिहान दर्ज्यानी चिन्ह प्रदान गरेका छन्।

प्रहरी सहायक निरीक्षक पदमबहादुर थापालाई प्रहरी नायब निरीक्षक र प्रहरी जवान नरबहादुर थापालाई प्रहरी हवल्दारमा बढुवा गरिएको प्रहरी प्रधान कार्यालयले जानकारी दिएको छ। बढुवा भएका दुवैको सुदूरपश्चिम प्रदेश प्रहरी कार्यालय दीपायल दरबन्दी रहेको छ।

प्रहरीले १३ दिनमै घटनामा संलग्न व्यक्तिलाई पक्राउ गरेको थियो। त्यस्तै भागरथी घटना अनुसन्धानमा महत्वपूर्ण भूमिका खेलेका सुदूरपश्चिम प्रदेश प्रहरी कार्यालय दीपायलका प्रमुख प्रहरी नायब महानिरीक्षक उत्तमराज सुवेदीलाई प्रहरी प्रधान कार्यालयले पुरस्कृत गरेको छ।

उनीसंगै अन्य चार जना प्रहरी अधिकृत र जवानलाई पनि प्रहरी प्रधान कार्यालयले पुरस्कृत गरेको जनाएको छ। पुरस्कृत हुनेहरुमा जिल्ला प्रहरी कार्यालय बैतडीका प्रमुख प्रहरी नायब उपरीक्षक नारायणप्रसाद अधिकारी, केन्द्रीय अनुसन्धान ब्युरोका प्रहरी नायब उपरीक्षक पञ्चकुमार बाखु, महानगरीय प्रहरी कार्यालय रानीपोखरी परिचालन कक्ष दरबन्दी भएका प्रहरी नायब निरीक्षक दुर्गाकुमार योञ्जन र प्रहरी चौकी हिकिला दार्चुला दरबन्दी रहेका प्रहरी जवान अशोक बहादुर कुँवर रहेको प्रहरी प्रधान कार्यालयले जानकारी दिएको छ ।

प्रकाशित मिति: बिहीबार, फागुन १३, २०७७ १२:२०

प्रतिक्रिया दिनुहोस्