दुई किशोरी अपहरण गरी बलात्कार गर्ने दुई युवक पक्राउ

सुरक्षा-अपराध

गृहपृष्ठ
सुरक्षा-अपराध
दुई किशोरी अपहरण गरी बलात्कार गर्ने दुई युवक पक्राउ

दुई किशोरी अपहरण गरी बलात्कार गर्ने दुई युवक पक्राउ

बुधबार, चैत ११, २०७७ बागेश्वरी पोस्ट

नेपालगन्ज । रुकुममा दुई किशोरी अपहरण गरी बलात्कार गर्ने दुई युवक पक्राउ परेका छन् । रुकुम पूर्वमा १४ र १५ वर्षका दुई किशोरीलाई अपहरण गरी शरीर बन्धक बनाई करणी गरेको आरोपमा रुकुम पूर्वकै १४ र २३ वर्षका दुई युवक पक्राउ परेको प्रहरीले जनाएको छ ।

चैत १ गते घरबाट हराएका ती किशोरीहरु नौ दिनसम्म पनि परिवारको सम्पर्कमा नआएपछि सोमबार मात्रै प्रहरीमा आफन्तको निवेदन परेको थियो । लगत्तै खोजलतास गर्दा रुकुमकोटबाट उनीहरु पक्राउ परेको जिल्ला प्रहरी कार्यालय रुकुम पूर्वका प्रहरी नायव उपरिक्षक गणेशबहादुर श्रेष्ठले बताउनुभयो ।

दुई किशोरीलाई २३ वर्षीय युवकको कोठामा बन्धक बनाएर जबरजस्ती करणी गरेको अवस्थामा फेला पारी उद्दार गरिएको प्रहरीले जनाएको छ । चैत १ गते अपहरण गरेर कोठामा बन्धक बनाएर राखेको दिनबाटै किशोरीहरुमाथि करणी हुँदै आएको अनुसन्धानबाट खुल्न आएको डीएसपी श्रेष्ठले बताउनुभयो ।

पक्राउ परेका दुई जनामाथि अपहरण, शरीर बन्धक र जबरजस्ती करणीको मुद्दा दर्ता गरिएको छ । किशोरीहरुको स्वास्थ्य परीक्षण गरी प्रहरीको संरक्षणमा राखिएको छ । उनीहरुको स्वास्थ्य अवस्था सामान्य रहेको र छिट्टै आफन्तको जिम्मा लगाउने डीएसपी श्रेष्ठले बताउनुभयो ।

प्रकाशित मिति: बुधबार, चैत ११, २०७७ ११:३२