प्रहरीले चलाएको गोली लागेका एक युवकको मृत्यु

सुरक्षा-अपराध

गृहपृष्ठ
सुरक्षा-अपराध
प्रहरीले चलाएको गोली लागेका एक युवकको मृत्यु

प्रहरीले चलाएको गोली लागेका एक युवकको मृत्यु

बुधबार, जेठ ५, २०७८ बागेश्वरी पोस्ट

नेपालगन्ज । नवलपरासीमा सशस्त्र प्रहरीले चलाएको गोली लागेका एक युवकको मृत्यु भएको छ । सशस्त्र प्रहरीको गोली लागेर घाइते भएका प्रतापपुर गाउँपालिका–६ का २२ वर्षका अविनाश रायको बुटवल सिटी अस्पतालमा उपचारको क्रममा बुधबार मृत्यु भएको हो ।

गम्भीर घाइते उनलाई अस्पताल पुर्‍याउने बित्तिकै मृत घोषणा गरिएको थियो । यस्तै प्रहरीको गोली लागेर ३० वर्षका विनोद राय घाइते भएका छन् ।

बुधबार बिहान सुस्ता गाउँपालिका–५ स्थित नथुई नाका (वनकट्टी)बाट भारततर्फ जान लागेका स्थानीय युवालाई सशस्त्र प्रहरीले रोकेको थियो । त्यसपछि ५०/६० जना स्थानीय युवाले सशस्त्र प्रहरीमाथि ढुंगामुढा गरेपछि गोली चलाएको सशस्त्र प्रहरीको दावी छ ।

‘भीडलाई नियन्त्रण गर्न सुरुमा अश्रुग्यास प्रहार गरेको भए पनि भीड अनियन्त्रित भएपछि बाध्य भएर एक राउन्ड गोली चलाएको हो’ सशस्त्र प्रहरी बल नेपाल नं २६ गण हेडक्वार्टर पश्चिम नवलपरासीका उपरीक्षक महेश अधिकारीले भने, ‘भीडले आक्रमण गर्दा एकजना सई शंकर बुढाथोकीको टाउकोमा गम्भीर चोट लागेको छ ।’

प्रकाशित मिति: बुधबार, जेठ ५, २०७८ १३:२३

प्रतिक्रिया दिनुहोस्