नेपालगञ्ज नगर हाँक्ने दौडमा कांग्रेसका तीन युवा

राजनीति

गृहपृष्ठ
राजनीति
नेपालगञ्ज नगर हाँक्ने दौडमा कांग्रेसका तीन युवा

नेपालगञ्ज नगर हाँक्ने दौडमा कांग्रेसका तीन युवा

आइतबार, असोज ३, २०७८ बागेश्वरी पोस्ट

प्रशान्त विष्ट, उमा थापा मगर र विनोद रिजाल

नेपालगञ्ज । लुम्बिनी प्रदेशको प्रमुख नगर नेपालगञ्जमा कांग्रेसको भावी नेतृत्वका बारेमा चर्चा चुलिँदो छ । विभिन्न अड्कलबाजी बीच कांग्रेसजनसंगै शुभचिन्तकहरु चासो व्यक्त गर्दै 'चिया गफ'मा नेपालगञ्जलाई केन्द्रमा राखेर गफिन थालेको धेरै दिन भइसक्यो । क्रियाशील सदस्यता विवादले अधिवेशनको सुनिश्चितता नहुँदा आकांक्षीहरुले मुख नखोले पनि कुनै न कुनै रुपमा उनीहरुको मनसाय प्रकट भइरहेको छ ।

नेपालगञ्ज उपमहानगरपालिकाका वर्तमान नगर सभापति प्रशान्त विष्ट, नेपालगञ्ज उपमहानगरपालिकाका उपमेयर उमा थापा मगर र नेपाल तरुण दल बाँकेका सचिव विनोद रिजालबीच प्रतिष्पर्धा हुने देखिएको छ ।

पूर्व पार्टी सभापति एवम् पूर्व प्रधानमन्त्री स्वर्गीय सुशील कोइरालाको गृहनगर भएर पनि 'विरासत बोकेको' नगरका रुपमा चित्रित नेपालगञ्ज उपमहानगरपालिकामा तीन जना चर्चित युवा नेताहरुको चर्चा छ । उनीहरुले उम्मेदवारी दिने अनौपचारिकरुपमा बताइसकेका छन् । साथीभाई, शुभचिन्तक र पार्टीपंक्तिमा उनीहरुको चर्चा व्यापक छ । नेपालगञ्ज उपमहानगरपालिकाका वर्तमान नगर सभापति प्रशान्त विष्ट, नेपालगञ्ज उपमहानगरपालिकाका उपमेयर उमा थापा मगर र नेपाल तरुण दल बाँकेका सचिव विनोद रिजालबीच प्रतिष्पर्धा हुने देखिएको छ ।

नेपालगञ्जका यी चर्चित तीन अनुहार आमनेसामने हुने अवस्था देखिँदा प्रतिष्पर्धा निकै रोचक हुने अनुमान कांग्रेस कार्यकर्ताले गरेका छन् । विगत १० बर्षदेखि नेपालगञ्ज नगर सभापतिका रुपमा काम गरिरहेका विष्ट, नेपालगञ्ज उपमहानगरपालिकामा उपमेयरका रुपमा काम गरिरहेकी थापा मगर र तरुण दलमा सक्रिय रिजालले नगर सभापतिमा उम्मदवारी दिने तयारी गरेका हुन् । कांग्रेसभित्रको समूहगत निकटका हिसाबले थापा मगर संस्थापन इतर समूहकी हुन् भने विष्ट र रिजाल संस्थापन समूहसंग नजिक छन् ।

नगर सभापति लड्न कांग्रेसको वडा अधिवेशनबाट क्षेत्रीय प्रतिनिधि बनेर आउनुपर्ने भएकाले पनि अहिले नै परिस्थिति परिपक्व नबनेको अवस्थामा अनुमान बेगरको 'सिन' पनि देखिन सक्ने सम्भावना भने कायमै छ ।

उपमेयर थापा मगरलाई संस्थापन इतर समूहबाट निर्विकल्प उम्मेदवारका रुपमा हेरिएको छ भने विष्ट र रिजाल एउटै समूहका भएकाले दुबै जना प्रतिष्पर्धामा उत्रिन्छन् वा एकले अर्कोलाई सघाउँछन्, यो अनुत्तरित छ । दुबैले सभापतिमै चुनाव लड्ने दृढता र अडान छाडेका छैनन् । एकले अर्कोलाई नछोड्ने अवस्थामा थापा मगरलाई यसको लाभ पुग्ने कांग्रेस बृत्तमा चर्चा छ । नगर सभापतिलाई भावी मेयरका रुपमा पनि हेरिने भएकाले चासोका साथ हेरिएको छ ।

नगर सभापति लड्न कांग्रेसको वडा अधिवेशनबाट क्षेत्रीय प्रतिनिधि बनेर आउनुपर्ने भएकाले पनि अहिले नै परिस्थिति परिपक्व नबनेको अवस्थामा अनुमान बेगरको 'सिन' पनि देखिन सक्ने सम्भावना भने कायमै छ । भोलिका दिनमा वडा अधिवेशनपछि आकांक्षीहरु अझै बढ्ने अवस्था पनि आउन सक्ने स्थानीय कांग्रेस नेताहरु बताउँछन् । यद्यपि मूलरुपमा नेपालगञ्ज नगर सभापतिका रुपमा यी तीनै अनुहारलाई हेरिएको छ । कांग्रेसले गाउँ/नगर अधिवेशन असोज ९ गते तोकेको छ । तर, असोज ५ गतेको वडा अधिवेशन नै प्रभावित हुने निश्चित जस्तै भएकाले नगर अधिवेशन पनि सर्ने देखिन्छ ।

प्रकाशित मिति: आइतबार, असोज ३, २०७८, १३:०९:००