शान्ति सुरक्षा कायम राख्न प्रतिबद्ध छु: डीएसपी तिवारी

सुरक्षा-अपराध

गृहपृष्ठ
सुरक्षा-अपराध
शान्ति सुरक्षा कायम राख्न प्रतिबद्ध छु: डीएसपी तिवारी

शान्ति सुरक्षा कायम राख्न प्रतिबद्ध छु: डीएसपी तिवारी

शुक्रबार, चैत ३, २०७९ बागेश्वरी पोस्ट

नेपालगन्ज । कोहलपुर प्रहरी प्रमुख सुन्दर तिवारीले आफ्नो क्षेत्राधिकारभित्र पर्ने सबै स्थानको शान्ति सुरक्षा कायम राख्न आफू प्रतिवद्ध रहने बताएका छन् ।

केही समय अघि मात्रै इलाका प्रहरी कार्यालय कोहलपुर प्रहरी प्रमुखको कमाण्ड सम्हालेका प्रहरी नायब उपरीक्षक (डीएसपी) तिवारीले कोहलपुर आउनु पूर्व नै आफूले कोहलपुरको समग्र वस्तुस्थितिका बारेमा अध्ययन गरेर वार्षिक कार्ययोजना तयार पारेको बताएका छन्। डीएसपी तिवारीले कार्ययोजना कार्यान्वयनका लागि सबै पक्षबाट सहयोग प्राप्त हुनेमा विश्वस्त रहेको समेत बताएका छन् ।

डीएसपी तिवारीले आफ्नो वार्षिक कार्ययोजना सार्वजनिक गर्दै आपराधिक गतिविधिका हिसावले ट्रान्जिट प्वाइन्टका रुपमा रहेको कोहलपुरमा शान्ति सुरक्षा कायम राख्नु चुनौतीको विषय भएपनि नयाँ ढंगबाट अप्रेशन सञ्चालन गर्ने योजनामा रहेको बताएका छन् ।

कार्यक्षेत्रको जनसंख्याको तुलनामा प्रहरीको संख्या निकै न्यून रहेकाले सेवा प्रवाहमा समेत समस्या देखिएको बताउँदै डीएसपी तिवारीले स्थानीय सरकार, निजी क्षेत्र र आम नागरिकसँग सहकार्य गरेर अघि बढ्ने योजना रहेको बताए । आफूले कमाण्ड गरेको सबै एरियाको शान्तिसुरक्षा चुस्त बनाउन दत्तचित्त भएर लाग्ने बताएका छन् ।

कोहलपुरमा विशेषगरी लागूऔषध कारोबार, साइबर अपराध, चोरी निकासी, सवारी दुर्घटना, आत्महत्या र महिला तथा बालबालिका विरुद्धका अपराधका घटना मुख्य समस्या रहेकाले यस्ता समस्या समाधान तथा न्यूनीकरणका लागि सामुदायिक प्रहरी साझेदारी कार्यक्रम अन्तर्गत सचेतनाका कार्यक्रमहरु सञ्चालनमा ल्याउने डीएसपी तिवारीले बताए ।

कोहलपुरमा लागूऔषध कारोबार डरलाग्दो अवस्थामा रहेको बताउँदै डीएसपी तिवारीले गएको १ महिनामा मात्र १५७. ४३ ग्राम लागूऔषध बरामद गरिएको बताए । कोहलपुर आए लगत्तै लागूऔषध प्रयोग तथा ओसारपसार नियन्त्रणका लागि ब्यापक जनशक्ति परिचालन गरिएको डीएसपी तिवारीले बताए ।

बिशेषगरी कोहलपुर प्रवेश गर्ने मुख्य नाकामा चेकजाँचलाई कडाई पार्दा पछिल्ला ७ महिनामा बरामद गरिएको लागूऔषधको तुलनामा पछिल्लो एक (फागुन) महिनाभित्रै धेरै लागूऔषध बरामद गर्न सफल भएको डीएसपी तिवारीले बताए ।

समय-समयमा हुने सवारी दुर्घटना, महिलामाथि हुने दुर्व्यबहार तथा आत्महत्या, अवैध उत्खनन, चोरी तथा लुटपाट, यौनजन्य गतिविधि जस्ता जघन्य अपराध नियन्त्रणका लागि कार्ययोजना बनाएरै अघि बढ्ने घोषणा गरेका डीएसपी तिवारीले आफू मातहतका कर्मचारीहरुबाट हुने कार्यसम्पादनको मुल्याङ्कन गरेर पुरस्कार तथा दण्डको ब्यवस्था समेत गरिने बताए ।

समस्या लिएर प्रहरी कार्यालय आउने सेवाग्राहीलाई सहज र नि:शुल्क सेवा प्रवाहका लागि कार्यालय परिसरभित्रै उजुरी तथा निवेदन लेखनका लागि हेल्प डेस्क समेत स्थापना गरिएको डिएसपी तिवारीले जानकारी दिएका छन् । डीएसपी तिवारी नेपाल प्रहरीतर्फ एक कर्तव्यनिष्ठ प्रहरी अधिकृतका रुपमा चिनिन्छन् ।

प्रकाशित मिति: शुक्रबार, चैत ३, २०७९ १४:५१